Asaun pasífiku ne’ebé halo hosi MUTIL tanba konsidera PN habokur-án de’it, la-haree ba povu ki’ik sira ne’ebé mak halerik hela.
“Sira hotu kan ba osan, buka riku de’it, karik sira reprejenta povu, tanba saida mak agora povu barak hakilar kona-ba pensaun vitalísia ne’e sira la-debate hodi halo alterasaun, sira hotu hanoin ba osan de’it, la-interese ba povu nia halerik no povu nia sofre durante ne’e”, Faustinho ba jornalista sira iha kampu eis kompi 744 Kulau Bekora, Tersa, (29/9).
Nia dehan, ezijensia atu halo alterasaun ba lei pensaun vitalísia la’ós de’it hosi akademiku, maibé entidade hotu inklui Prezidenti Repúblika, Taur Matan Ruak.
Hatete tan, bainhira asaun ne’e laiha rezultadu, ninia parte sei hasoru Prezidenti PN. “Ami tenki hasoru malu ho Prezidente PN Vicente Guterres hodi bele responde ami nia ezijensia no ami bele esplika ami nia razaun husu ba PN atu altera urjentemente lei pensaun vitalísia”, Faustinho dehan.
Faustinho informa, loron ikus asaun sei konvida PR TMR ho eis PR José Ramos Horta atu fó esplikasaun ba komunidade sira kona-ba pensaun vitalísia.
“Karta konvite ba ona PR Taur ho ita nia premiadu Nobel da Paz José Ramos Horta atu mai fatin manifestasaun hodi esplika ba povu. PR Taur ita bolu mai atu esplika nia promesa iha kampaña prezidensial ne’ebé mak promete atu altera lei pensaun vitalísia ne’e, maibé mandatu atu hotu ona mós seidauk kumpri promesa ne’e”, nia tenik tan.
Situasaun ne’e, tuir nia, povu barak laran kanek no fuan kanek ba PR nia promesa. Maibé, Horta mai atu fó apoiu morál ba públiku katak, impaktu ba futuru ne’e la-di’ak, nune’e ukun nain sira rona, bele altera lei pensaun ne’e.(tay/dgx/vas/fer)
Timor Post