DILI - Deputadu sira iha uma fukun Parlamentu Nasionál (PN) deklara, sei la-halo alterasaun ba lei pensaun vitalísia iha presaun ka ezijensia hosi grupu balun de’it. Entretantu, situasaun ne’e tuir sosiedade sivíl , deputadu sira laiha ona lejítimidade hodi reprejenta povu.
Sikun seluk, Movimentu Universitariu Timor-Leste (MUTIL), Tersa, (29/9) iha kampu eis Kompi 744 Bekora, kontinua halo asaun pasífiku ba loron daruak hodi kontra PN tanba seidauk altera lei pensaun vitalísia ne’ebé konsidera habokur de’it grupu balun.
Mesmu nune’e iha tempu hanesan, Prezidenti Repúblika Taur Matan Ruak iha Palasiu Prezidenti durante inkontru ho reprejentante sosiedade sivíl sira hatete, garante ba reprejentante povu sira sei muda lei ne’ebé sai ema hotu nia preokupasaun.
Entretantu, deputadu sira dehan, konsidera asaun manifestasaun kontra PN ne’ebé halo hosi MUTIL. Maibé, presiza atu deskute uluk lei sira ne’ebé mak prioridade.
Deputadu Eládio Faculto de Jesus hosi bankada FRETILIN hatete, lei fó dalan ba sidadaun hotu atu espresa hanoin no krítikas sira, maibé tenki ho krítikas ne’ebé mak konstrutivu.
“Dala-barak ita rona estudante sira trata ita laiha fatin, dehan deputadu sira hanesan korruptor, ha’u hanoin se marka pozisaun hanesan ne’e, imi kontra produtividade ba ami nia konsiderasaun”, Eládio dehan iha plenária, Tersa, (29/9).
Eládio ne’ebé mak hanesan mós alumni hosi Fakuldade Siensia Sosiais no Polítika (FISIPOL), Universidade Nasionál Timor-Leste (UNTL) dehan, sei la-konsidera ba pozisaun ne’ebé de’it, kuandu parte ida estudante sira jeneraliza situasaun para análiza situasaun sosio-ekonómiku no polítiku hodi dehan, deputadu sira in-produtivu hodi hakarak lejítima orgaun soberania.
“La’ós tanba kiak mak mai túr iha parlamentu nasionál hodi simu pensaun vitalísia, maibé tanba konsiderasaun estadu Timor-Leste. Labele hanoin atu trata de’it, maibé ami deputadu sira mós respeita imi estudante nia emosaun no responsablidade ba nasaun Timor-Leste”, Eládio dehan.
Aleinde ne’e, deputada Domingas Alves Bilou Mali hosi bankada CNRT hatete, durante kampaña, partidu hotu inklui CNRT rasik deklara atu halo revizaun ba lei pensaun vitalísia ne’e.
“Maibé ita la’ós hanesan manu rade hemu bee, buat ne’e liu hosi prosesu, no agora dadaun ne’e proposta lei barak mak governu haruka mai Parlamentu Nasionál, lei balun ho karater urjente. Balun deputadu sira aprova ona no lei barak mak sei iha meja komisaun A nian liman, ita sei haree hotu, haree hotu depois sei to’o ba lei pensaun vitalísia”, Bilou Mali aumenta.
Bilou Mali mós husu ba estudante sira atu halo asaun tenki krítikas ne’ebé mak atu dezenvolve no labele hasai deklarasaun ne’ebé mak hatun dignidade orgaun soberania ida hanesan PN.
Bilou realsa, tuir lei ne’ebé mak vigora, pensaun mensal vitalísia ne’e la’ós de’it ba eis titulares sira iha PN, maibé vale mós ba orgaun soberanu sira seluk nia ema hanesan Prezidensia Repúblika, Governu no Tribunál.
Nune’e mos, Osorio Florindo hosi bankada FRETILIN hatutan, petisaun hosi estudante sira ne’e nia pontus importante mak husu atu reve lei pensaun vitalísia.
“Legalias barak la-halimar ke ha’u hanoin deputadu no eis deputadu barak mak ezerse. Por-ezemplu hatama kareta hosi estranjeiru livre taxa, sosa material konstrusaun livre taxa. Tanba ne’e ba ha’u estudante sira nia petisaun ne’e em prinsipiu razoavel ita atu deskute lei pensaun vitalísia ne’e. Importante mak ita tenki deskute duni, buat balun mak ita konsidera no buat balun ita tetu”, Osorio ne’ebé mak sai ona deputadu hosi bankada FRETILIN ba periodu III dehan.
Prezidente bankada FRETILIN, Aniceto Guterres mos hatutan, polítika atu halo revizaun iha ona konsensu nasionál ida entre bankada sira.
Aniceto realsa, karta petisaun ne’ebé mak estudante sira hato’o hanesan fó ameasa ida (la-halo revizaun estudante prontu fó án ba mate).
“Komunikadu imprensa (petisaun) ne’ebé mak hato’o mai parlamentu ne’e la’ós ona hato’o aspirasaun ba parlamentu hanesan reprezentante povu, ne’e halo ona presaun. Maibé, parlamentu labele servisu (reve lei vitalísia) iha presaun nia okos”, deputadu komisaun A ne’e dehan.
Tuir nia, PN atu halo diskusaun no revizaun ba lei ruma tenki la’o tuir ajenda. Tanba ne’e estudante sira la-presiza halo presaun ba deputadu sira atu halo revizaun ba lei vitalísia ne’e.
“Ha’u deputadu, reprezentante povu, ha’u servisu iha sensibilidade ba asuntu povu nian, mas labele halo presaun hanesan ne’e”, Aniceto afirma.
Deputadu Fransisco da Costa hosi bankada CNRT mós husu ba estudante sira ne’ebé mak halo manifestasaun tenki respeita PN hanesan orgaun soberanu ne’ebé reprezenta povu.
“Parlamentu Nasionál la-hakru’uk no la-halo tuir desizaun hosi pessoal ka grupu ida nia hakarak. Tanbasá mak ha’u hatete hanesan ne’e, tanba lei sira ne’ebé mak baixa ba komisaun espesializada ne’e tenki deskute ida-ida, hafoin to’o lei pensaun vitalísia, tanba ne’e labele halo fali presaun ida katak tenki halo tuir fali pessoal ka grupu ida nia hakarak”, deputadu ne’e katak.
Deputadu ne’e realsa, estudante nia direitu hodi ezijé, deputadu sira respeitu no tau iha konsiderasaun, tanba ne’e husu atu parte hotu tenki respeita malu, tanba lei pensaun vitalísia ne’e sei iha duni diskusaun no revizaun.
Relasiona ho asaun hosi estudante sira, Prezidente PN, Vicente Guterres hatete, sei hasoru malu ho reprezentante estudante universitariu sira nian ne’e hodi halo dialogu.
Tuir planu, Kinta (1/10), Prezidente PN sei iha inkontru ida ho lideres bankada hodi foti desizaun ida konkreta molok hasoru malu ho reprezenta estudantes.
“Maibé, tenki hetan desizaun liu-hosi inkontru lideres bankada sira hotu”, Vicente Guterres tenik.
Timor Post