DÍLI - Ema deskoñesidu baku membru Polísia Nasionál Timor-Leste (PNTL) Eskuadra Becora nian to’o tama iha sala emerjénsia Hospitál Nasionál Guido Valadares (ONGV) tanba hetan kanek maka’ás iha parte oin nian.
Akontesementu ne’e akontese iha área Becora, Has-Laran, Domingu (27/9) lokraik, bainhira ema deskoñesidu sira ne’e ho kareta liu-hosi área refere no soke kois Polísia na’in tolu ne’ebé maka ho motór depois Polísia hapara sira no mosu diskusaun oituan ikus mai sira baku Polísia na’in tolu ne’e no na’in ida kanek todan, lori kedas ba HNGV.
Tuir sasin ne’ebé maka lakohi públika nia naran dehan, membru polísia na’in tolu ne’e ho motór hosi Eskuadra Becora atu ba terminál maibé iha dalan hasoru kedas ema sira ne’e no tuku polísia ne’e nia oin laran hodi monu tun ba rai foti tan fatuk riba tan ba nia oin.
“Ha’u halai mai haree depois sori tiha konfrontasaun ne’e. Sé ha’u maka laiha, Polísia na’in tolu ne’e dala ruma ida bele mate,” dehan fonte ne’e ba Timor Post iha Becora, Domingu (27/9).
Iha fatin seluk, Komandante Jerál PNTL Komisiáriu Júlio da Costa Hornai dehan, nia rona ona nia membru hetan baku hosi ema deskoñesidu maibé husik ba investigasaun la’o maka foin bele hatene tanba saida maka sira baku no baku iha ne’ebé.
“Kódigu Penál maka sai medida. Ne’ebe, ita hotu iha Kódigu Penal nia okos. Sé maka komete krimi, artigu ne’ebé maka nia kontra nia pena mós iha ne’ebá kastigu. Ne’e Kódigu Penál maka haree liu ba ida ne’e,” dehan Komandante Jerál ne’e ba jornalista sira iha Kuartel UEP, Bairu-Pité, Segunda (28/9).
Nia hatutan, atu baku militár, sivíl ka polísia iha prosesu para uza hodi bele prosesa autór sira ne’ebé maka halo krimi.
Nia dehan, relatóriu seidauk tama iha nia meza, tanba ne’e nia seidauk ko’alia klaru liu ba públiku. Sei hein depois haree tiha relatóriu hosi Komandu Distritu Díli maka foin bele fó sai klaru ba públiku.
Tuir informasaun ne’ebé maka jornalista Timor Post hetan hosi membru PNTL balun iha Distritu Díli nian katak, polísia kaptura ona suspeitu na’in tolu ne’ebé maka baku membru Polísia iha Becora nian. Suspeitu na’in tolu ne’e kaptura iha área Surikmas.(Way)
Timor Post