Servisu Eletrisidade Timor Leste (EDTL) husu ba komunidade sira atu hato’o keixa ba EDTL wainhira kaer toman ema halo liegasaun ilegal ba eletrisidade.
Direitor Jeral EDTL, Virgílio F. Guterres hateten, durante ne’e seidauk iha komunidade ida maka hato’o keisa ba iha EDTL kona-ba ema sira ne’ebé halo ligasaun illegal liu-liu iha kapital Dili.
“Ida ne’e maka problema, ne’e maka ami husu ba populasaun nia kolaborasaun atu bele ajuda EDTL, tanba osan ne’ebe Governu gasta ba halo investimentu eletrisidade ne’e povu nia osan,” hateten Virgilio Guterres ba jornalista iha nia servisu fatin, Caicoli, Segunda (21/09/2015).
Nia hatutan, iha Dili laran, ema halo ligasaun ahi illegal ne’e barak, maibé ekipa husi EDTL nian mós sempre tun ba iha terenu hodi halo inspesaun tama bairo sai bairo.
“Sansaun maka ida ne’e, ami kua sira nia ahi i mós sira tenki mai regularija tiha sira nia situasaun maka ami ba tau fali kontador,” Virgilio hateten.
Nia dehan, ba sira ne’ebé iha ona kontador klaru katak sira nia istoria ou sira nia record iha sistema iha hela.
“Ami mai loke sira nia record iha sistema ne’e iha hela hodi hare sira la uza ahi horibainhira, sira uja bai-bain ne’e hira, entaun kalkula ho ida uzu montante mensal anterior ne’e i depois maka selu tan, quer dizer multa maka ami bele ba tau fali,” esplika Virgilio.
Tuir nia, oras ne’e dau-daun ekipa EDTL nian hahu instala ona prepagu foun ho naran Automatic Meter Reading ou Leitura Automatika ba konsumidor bobot sira iha kapital Dili.
“Hau hakarak informa deit ba ita bo’ot sira liu-liu ba konsumidores bobot sira ne’e, agora ami hahu dau-dauk instala buat ida Automatic Meter Reading ou ita bolu leitura automatika,”nia katak.
Nia dehan tan, leitura automatika ne’e, EDTL la presija fulan-fulan tun ba hasai leitura iha konsumidor ida-idak nia uma, maibé EDTL tur deit iha fatin no sistema maka supervisiona direitamente.
“La presija ema ba iha ne’eba, ema iha ne’e detekta kedas, ami ba kedas iha fatin, ne’e duni agora ita neneik, maibé ita tenki kria sistema hodi nune’e konsumidor bobot ne’ebé uza ahi ne’e tenki selu taxa tuir sira nia uzu,” nia dehan.mia
Jornal Nacional