Atu atinji liga futeból professionál iha futuru, faze dala uluk, Governu liu-hosi Sekretaria Estadu Juventude no Desportu (SEJD) kria ona Liga Amadór. Estrutura Asembleia no Konsellu Ezekutivu Liga Amadór ne’e, hetan ona posse hosi Primeiru Ministru, dr. Rui Maria de Araújo iha edifísiu SEJD, Seonal, Díli, Tersa (22/09/15).
Iha nia deskursu, Primeiru Ministru Rui agradese ba SEJD tanba dinamiza ona dezenvolvimentu futeból foun ida ho naran Liga Amador.
“Bainhira ita sai hanesan labarik sira hodi hamorin TL nia naran iha mundu, ita tenki serbisu hanesan labarik sira ne’e. Labele hadau malu pozisaun no buka sokar lia ba malu,” nia sujere.
Eis Ministru Saúde iha Primeiru Governu Konstitusionál ne’e dehan katak adultu sira tenki apriende barak hosi labarik sira.
Iha fatin hanesan, Sekretáriu Estadu Juventude no Desportu, Leovigildo Hornai informa katak seremónia tomada de posse estrutura refere hanesan orgullu ba timoroan. Ne’e hatudu katak iha duni kualifikasaun no iha nia prestijiu ida nune’e hatudu ba mundu katak nasaun ida ne’e mós bele iha modalidade futeból.
“Importante liu maka liu maka timoroan tomak tenki iha sentidu responsabilidade no sentidu partriotizmu no mós nasionalizmu ba dezenvolvimentu futeból iha rai laran,” nia tenik.
Nia husu atu timoroan sira tenki hamutuk. Laiha razaun dehan atu fahe malu no mós laiha razaun atu kria gap (rival) ba faze dezenvolvimentu desportu futeból nia laran.
Enkuantu, Prezidenti Konsellu Ezekutivu Liga Amadór (PKE), Nilton Gusmão dehan katak tomada de posse ne’e marka istória ida ba dezenvolvimentu desportu, tanba sira hotu ne’ebé enkuadra iha órgaun, promete atu lori susesu atividade liga ne’e.
Nilton informa, Estrutura Konsellu Ezekutivu ne’e konsiente katak, susesu sira iha serbisu estrutura ne’e maka sei fó signifikativu ba órgaun ne’ebé nia lidera.
Atu to’o iha objetivu, nia husu apoiu no koordenasaun tomak hosi governu liu-hosi SEJD, Prezidensia Asembleia Jerál Liga Amadór, Federasaun Futeból Timor-Leste (FFTL) no sosiedade hadomi futeból sira.
Iha biban ne’e, Olandina Caeiro hanesan Prezidenti Asembleia Jerál Liga Amador hateten katak Liga Amadór ne’ebé hamosu ona iha nasaun ida ne’e labele lakon fila fali.
Maske feto mesak ida iha mane nia klaran, Olandina informa, nia iha komitmentu oinsá serbisu hamutuk hodi tane ás Liga Amadór ne’e, nune’e futuru ezisténsia Liga ne’e labele monu ba rai.(Anibal)
Matadalan