Primeiru Ministru (PM) Rui Maria de Araújo iha inisiativa di’ak halo inspesaun surpreza ba kada Ministériu nune’e haree problema sira nebe mak durante ne’e kada Ministériu infrenta iha prosesu dezenvolvimentu.
Maibé inisiativa PM Rui nian ne’e, Ministrus barak mak la tau iha konsiderasaun, no balun kontra orientasaun ne’ebe PM Rui fo hodi hadi’a problema sira ne’ebé mak identifika ona, no husik problema sira ne’e eziste to’o agora.
PM Rui Araújo halo ona inspesaun ba Ministériu barak hanesan, Portu Dili, Diresaun Nasional Transporte Terestre (DNTT), Ministériu Komersiu Industria i Ambiente, Eskola bazika no Sekundaria, inklui mós fatin sira ne’ebé durante ne’e, hala’o servisu hodi hatama impostu.
Maibé problema sira ne’ebé mak Xefi Governu identifika iha Ministériu sira ne’e, to’o agora sei kontinua ejiste nafatin.
“Mudansa ne’e iha, balu iha mudansa barak, balu iha mudansa neneik, tanba iha fatores barak, mas dinámika dezenvolvimentu ho mundansa ne’e, mak hanesan ne’e duni,”dehan Rui Araújo ba jornalista sira Sesta (18/9).
Rui Araújo dehan, problema sira ne’ebé kontinua eziste ne’e sei hadia neneik, importante mak, hot-hotu tenke hatudu vontade di’ak, atu halo di’ak sasan no problema hotu ne’ebé akontese iha instituisaun Estadu ida-ida nia laran.
Alende ne’e, Primeiru Ministru Rui Maria de Araújo mós esklarese katak, proposta husi Ministériu Komersiu Industria ninian kona-ba atu sosa produtu lokal ne’e, tenke konsidera nafatin, tanba Governu sosa produtu povu nian ne’e, atu insiativa produtores sira.
Tanba ne’e, Rui Araújo husu ba Ministériu Komersiu Industria ho Ministériu Agrikultura atu haree, oinsa ho osan ne’ebé mak Estadu iha atu sosa foos, presiza insiativa.
“Tanba foos ne’ebé ita sosa husi liur, nia folin centavus hat nulu kada kilo ida, maibé se ita sosa husi haree mak ita transform a ba foos, agora dadauk haree ne’e, kilo ida centavus lima nuru resin rua, ita dulas tiha sai foos, kilo ida purvolta dolar ida resin, nia presu ne’e bo’ot liu, duke foos ne’ebé mak ita importa,”katak Rui Araújo.
Entaun, Ministériu Komersiu Industria ho Agrikultura, presiza servisu maka’as hodi haree, oinsa mak estabelese presu ida ne’e.cos
Jornal Nacional