Membru Parlamentu Nasionál (PN) husi bankada CNRT, Cesar Valente hateten katak, kuandu halo revizaun ba pensaun vitalísia husi saláriu báziku 100% reduz ba 50%.
“Ita haree referensia depois ita desidi tuir ita nia realidade, hau hanoin kuandu revizaun lei pensaun vitalisia ne’e sei bele reduz saláriu báziku 100% ne’e ba 50%, husi saláriu ne’ebé nia simu $ 1.600 ne’e fahe halo hanesan,”dehan deputadu Cesar Valente ba Jornalista sira, iha Centro Convenções Dili (CCD), Kuarta (16/9).
Deputadu ne’e hatutan katak, iha lei koalia kona ba pensaun vitalísia ne’e, pensaun vitalisia ne’e sura deit mak saláriu báziku ne’e katak kompletamente 100% nia simu 1.600, mas bainhira dehan katak koalia ho regalias ne’e $ 3.000 (três mil).
“Mas ha’u la hatene sira be simu ne’e keta três mil karik, maluk sira eis titular ona ne’e simu hira ba husu tok sira simu hira. Koalia dehan saláriu báziku entaun $ 1.600, tanba lei ne’e mak hateten katak iha direitu ba 100% ba saláriu báziku. Agora dadauk ida bee ativu hela ne’e kada deputadu ida simu $ 3.000 (três mil). Ne’e mak regalia sira hanesan pulsa kontaktu eleitorál, mina ense ba transporte, saúde no selu-seluk tan,”nia hateten.
Deputadu Cesar hateten, atu hatun regalia entaun iha orsamentu nia laran hatun, tanba regalias ne’e normalmente atraves husi diskusaun iha PN, razaun sira ne’ebé mak deputadu sira foti iha ne’ebá mak hodi tau hamutuk ba planu ida hodi hasa’e regalias ne’e.
Cesar Valente hateten tan katak, wainhira koalia konaba pensaun vitalisia ne’e mak presiza halo redusaun entaun presiza mós bankada sira hetan konsensus, tanba deputadu ida deit labele kontra deputadu 64.
“Hanesan deputadu CNRT ami konsistente, ha’u pesoal konsistente katak tenki haree 50 ka 50 ou 75% katak husi ida ne’e 25% fó ba ida ne’ebé, ne’ebé ha’u hanoin reduz regalias ne’e la’os buat susar ida, ne’e iha diskusaun orsamentu ne’e deputadu sira bele koalia,”nia hateten.
Deputadu bankada CNRT ne’e afirma tan katak, no koalia konaba regalias ne’e mós la’os lor-loron deputadu sira tenke hetan pulsa lae, maibé hetan ho polítika ida ne’ebé mak bele fó moris ba sidadaun hotu.
Deputadu Cesar hateten katak, lei ne’e la ba kotuk, lei ne’e ba oin. Ne’ebé kuandu deputadu sira halo agora, entaun ba oin ne’e lahetan ona ida ne’e. Maibé sira ida ne’ebé mak liu tiha ona ne’e kontinua simu normal 100% nafatin.
Sira ne’ebé simu ona nune’e ona, agora ami ne’ebé mak atu halo agora mak ba oin labele simu ona hanesan ida ne’e,”deputadu Cesar hateten.
Iha fatin hanesan membru PN husi bankada PD, Virgilio Hornai hatete, pensaun vitalísia ne’e koalia kona ba deit ba saláriu báziku, tanba ema sira iha direitu ba eis membru Governu, eis deputadu, eis titulares ne’ebé iha direitu ba pensaun vitalisia ne’e, sé bainhira sira nia mandatu remata, ne’e sira só iha direitu deit ba saláriu báziku,” dehan deputadu Virgilio.
Nia hateten tan katak, se nia re-eleitu ka nia iha fiar fila fali atu hala’o kna’ar Estadu nian ne’e entaun pensaun vitalisia ne’e nia lasimu, nia simu ida hala’o hela knar ba.
Maibé dehan nia, konaba buat ida regalia ne’e iha pensaun vitalisia ne’e laiha, tanba regalia ne’e kecuali (ecepto) hanesan abonu de reprezentasaun, alojamentu, telefónika ou kombustivel ne’e bainhira ne’e nia sei hala’o knar efetivu ne’e mak iha regalias ne’e, mas to’o reforma ona ne’e regalia laiha ona.
“Ami Partidu Demokrátiku (PD) hakarak hatán ba preokupasaun sosiedade nian katak, presiza halo revizaun ba ida ne’e, entaun PD hatama proposta de revizaun ida, agora kestaun ne’e mak iha revizaun ne’e material saida, sera que iha redusaun ba persentajen pensaun vitalisia ou saláriu báziku ne’e ka halo nusa, sé halo redusaun karik halo redusaun ba ninia persentanjen saláriu báziku ne’e, tanba laiha ona aitem seluk ne’ebé eis titular, eis deputadu no eis membru Governu sira atu hetan,”dehan deputadu Virgílio.eni
Jornal Nacional