Estadu Timor Leste fó kondekorasaun ba sidadaun Japones 13, ne’ebé fó sira nia tulun hodi apoia prosesu luta libertasaun Timor Leste nian.
Ministru Negosius Estranjeirus no Kooperasaun (MNEK), Hernani Coelho informa katak, nia simu kna’ar atu kondekora sidadaun Japones sira ne’e, husi Prezidente da Repuúblika, Taur Matan Ruak, tanba Prezidente rasik labele hakat liu ba Japaun.
“Ha’u mós liu ba iha Japaun, hodi halo kondekorasaun ba ita nia maluk Japanes sira ne’ebé mak durante iha periodu rezistensia, fó tulun ba Timor Leste ba ita nia prosesu libertasaun,”informa Hernani Coelho ba jornalista sira iha MNEK Dili, Segunda (14/9).
Hernani esklarese, hafoin akompaña Prezidente ba China, Xefi Estadu Taur Matan Ruak delega kedas nia ba Japaun hodi fó kondekorasaun ba Japones sira ne’ebé mak fó ona sira nia kontribuisaun ba povu Timor Leste nia luta.
“Ha’u ba reprezenta Prezidente da Repúblika, hodi hato’o kondekorasaun ba ita nia membrus sira, hamutuk ema nain 13,”informa Hernani.
Hernani dehan, kondekorasaun ne’ebé Estadu fó ba maluk Japones sira ne’e, balu ba simu rasik tanba sira sei moris, no balu reprezenta husi sira nia familia, tanba sira mate ona.
Alende ne’e, Hernani mós informa katak, iha Japaun mós, nia hasoru malu hodi enkontru ho emprezariu Japaun sira, ne’ebé mak involve iha área gas, mina, pescas, Agrikultura, Komersiu, nomós iha área industria nian.cos
Jornal Nacional