DILI - Esforsu barak atu hadia sistema serbisu administrasaun públiku iha Timor-Leste hahu kedas ona iha primeiru governu konstitusionál, maibé to’o oras ne’e laiha mudansa, tanba serbisu administrasaun husi loron ba loron karun Demais.
Dosente Universidade Nasionál Timor-Leste, Valentim Ximenes hatete, durante tinan barak ona kestaun atu hadia sistema administrasaun públiku la’o kleur durante tinan barak ona, maibé to’o agora mós laiha mudansa buat ida, tanba realidade hatudu serbisu administrasaun públiku la’o neneik demais, tanba todan. Sistema administrasaun públiku burokratiza no laiha transparensia.
Nia hatutan, atu rezolve problema ne’e mak tenke hadia uluk sistema administrasaun públiku iha administrasaun lokal. Se lahala’o mudansa ba administrasaun lokal, entaun administrasaun sentral ne’e sei lala’o ida no tuir fali mak tenke hadia sistema funsionalizmu públiku. Mudansa ba administrasaun públiku ne’e tenke iha urjensia no koerensia.
“Uluk ami halo serbisu ida hamutuk ho governu atu bele implementa munisipiu iha teritoriu tomak hodi bele lori hikas ema husi Dili fila ba nia munisipiu ida-idak, maibé realidade ohin loron la realiza. Ida ne’e ita nia sistema administrasaun públiku mak ladi’ak,” hatete Valentim Ximenes bainhira sai orador ida iha seminariu ho tema Reforma Administrasaun Públiku iha Timor-Leste ne’ebé organiza husi UNTL iha kampus Caicoli-Dili, Kinta (03/09).
“Agora tuir loloos ita ita tenke implementa pre-dezentralizasaun, maibé ba uja fali pre-deskonsentrasaun ne’ebé mós hanesan delega kompetensia,” kestiona Valentim.
Eis Jornalista Suara Timor-Timur (STT) ne’e esplika pre-deskonsentrasaun katak orientasaun ida mai husi superior ba nia funsionáriu sira iha nivel karaik hodi halo mudansa ba instituisaun ne’ebé sira serbisu ba. Entretantu, munisipiu katak komunidade sira mak prepara sira nia programa no sira rasik mak hala’o. Governu sentral só aprova de’it osan, maibé labele halo intervensaun.
“Governu sentral laiha kompetênsia hodi halo intervensaun, maibé iha dever hodi aloka osan,” simplifika kandidatura doutoramentu husi Brazil ne’e.
Atu bele solusiona sistema administrasaun públiku ne’ebé karun, todan, laiha transparensia no burokratiza demais, dosente Valemtin sujere ba sira ne’ebé iha poder polítiku tenke halo reforma administrasaun lokal no reforma sistema funsionalizmu públiku. Prinsipiu reforma ne’e tenke refere ba kualidade serbisu ba komunidade.
Konstituisaun RDTL iha artigu 5 númeru 1/2014 ko’alia kona-ba prinsípiu desentralizasaun administrasaun, hanesan fatór fundamentál ba organizasaun territoriál estadu nian, konstituisionál ne’e rekoñese katak ho interese lokál ne’ebé di’ak liutan atu kontinua konkretiza populasaun sira nia mehi no ambisaun, bainhira aplika lei fundamentál sira ne’e ho di’ak, maibé realidade hatudu husu loron ba loron serbisu administrasaun públiku oras ne’e la’o neneik loos hanesan lenuk iha tasi laran.
Primeiru-Ministru, Rui Maria de Araújo iha nia diskursu seremónia tomada posse ba governu atual iha loron 16 Fevereiru 2015, promete katak nia governasaun sei halo esforsu atu hamihis netik no kombate kultura burokrasia iha serbisu administrasaun públiku, maibé realidade hatudu prosesu halo karta kondusaun mós lori to’o tinan rua mak foin bele hetan karta ida. Nune’e mós prosesu atu halo Billete Identidade mós persija semana ida kedas mak foin hetan. Inklui mós halo sertidaun RDTL, rejistu kompañia no halo pasaporte. Kestaun hirak ne’e to’o ohin loron laiha mudansa, mak nafatin hela de’it to’o halo PM Rui mó kolen ona hodi halo nia vizita surpreza (inspesaun urjente).(oki)
Timor Post
Timor Post