Primeiru Mnistru, dr. Rui Maria de Araújo la satisfeitu ho ema balun halekar informasaun liu-hosi mídia sosiál (Blog Timor Hau Nia Doben ho Facebook) kona-ba ninia inan no aman no kestiona ninia kredibilidade polítika.
Lui-hosi ninia wall facebook, semana ne’e, PrimeiruMinistru Governu Timorense ne’e deklara katak nia la koñese ninia amanbiolójika hanesan ema balun akuza nia liu-hosi mídia sosial ne’ebé temi iha leten katak ninia aman maka eis Governadór Provínsia Timor-Timur, Sr. Arnaldo dos Reis Araújo.
“Hahú semana hirak liu bá, iha ema balun halekar informasaunliu-hosi mídiasosiál (blog Timor Hau nia Doben no mós facebook) kona-ba ha’u nia filiasaun ka kona-ba hau nia aman ho inan, ho komentáriu hodi kestiona ha’u nia kredibilidade polítika. Tanba respeitu ba sidadaun tomak ninia direitu atu hetan informasaun ne’ebé loos, no mós respeitu ba Povu Timor-Leste ninia direitu atu hatene loloos, sé sira bele konfia iha ema ida ne’ebé oras ne’e daudaun xefia hela VI Governu RDTL, ha’u hakarak hato’o pontu hirak tuir mai ne’e: (1) Ha’u moris iha Mape, Zumalai, ha’u nia inan biolójika naran Felismina Lopes. Infelizmente ha’u la koñese ha’u nia aman biolójiku,” Rui haktuir.
(2) Mestre katekista José de Araújo (hosi AInaro) no mestra katekista Laura de Jesus Araújo (hosi Uatucarbau,Viqueque) maka foti ha’u ba haki’ak hahú kedas ha’u sei iha idade fulan tolu. (3) ha’u boot iha família José no Laura Araújo nian, no to’o ohin loron ha’u pertense ba família ida ne’e. (4) Iha tinan 1974, José de Araújo sai delegadu ASDT/FRETILIN hodi harii partidu ne’e ninia komité rejionál iha Covalima, hafoin nia rasik hetan fiar nu’udar Sekretáriu Rejionál to’o Indonézia invade Timor-Leste.
(5) Iha tinan 1976, tropa Indonézia kaptura José de Araújo lori ba prizaun to’o tinan 1979, sein iha julgamentu. (6) Hahú hosi kedas idade tinan 10, ha’u apriende ho ha’u nia aman haki’ak José de Araújo, atu hadomi Povu Maubere, no luta ba Timor-Leste ninia indenpendénsia. (7) Iha tinan 1975 to’o tinan 1978, halai iha ailaran, iha Setór Fronteira Sul hamutuk ho ha’u nia inan bilójika, inan haki’ak, no familia sira seluk.
(8) Iha tinan 1978 ha’u nia inan biolójika Felismina no ha’u nia alin feto na’in rua, lakon iha serku anikilamentu ne’ebé tropa Indonézia sira halo iha Setór Fronteira Sul. To’o oras ne’e seidauk hatene sira nia restus mortais iha ne’ebé. (9) Maski ha’u la koñese ha’u nia aman biolójiku, felizmente, desde ki’ik kedas ha’u hatene no konsidera José de Araújo no Laura de Jesus Araujo nu’udar ha’u nia aman no inan rasik.
“Sira maka haki’ak ha’u, haburas ha’u nia espíritu nasionalista no eduka hau to’o sai médiku iha tinan 1994, hafoin suporta nafatin ha’u nia moris, to’o sira fila hikas ba Maromak ninia Kadunan Santu. Bele haree dokumentu no fotografia balun iha aneksu. Obrigadu barak ba belun sira hotu nia kompriensaun,” Eis Ministru Sáude ne’e haklaken. (*)
Matadalan