Fatin fa’an ikan, na’an no modo tahan ne’ebé mak Governu liu husi Ministériu Comersiu Industria (MCI) halo iha merkadu Manleuana ho total uma 9, oras ne’e dadaun vendedor sira abandona hela ona, tamba laiha kompradór ruma mak ba sosa sira nia sasan nune’e modo tahan sira sai namlaik no dodok deit.
Tuir observasaun Jornalista Jornal Nacional Diário (JND), iha merkadu Manleuana Dili, Kinta (3/9) ne’e nota katak, uma 8 ne’ebé mak sai fatin ba vendedores sira ne’ebé mak atu fa’an ikan, na’an no modo tahan sira ne’e sai mamuk los.
Razaun vendedores sira husik fatin hirak ne’e,tamba dehan katak, durante sira muda husi merkadu Comoro hodi ba fa’an fali iha ne’eba sira nia modo, na’an no ikan la folin no namlaek, tamba laiha komparador atu ba sosa sasan.
No oras ne’e dadauk vendedores sira muda fali ona ba iha merkadu Comoro.
Vendedores sira mós dúvida oituan, tamba kompradores sira la’o ho distánsia do’ok, tamba kompradores balun la gosta la’o. Pior liu mak balun la hatene fatin tan.
Vendedores sira ne’ebé mak agora dadauk fa’an iha merkadu Manleuana ne’e maioria mak vendedor ne’ebé mak fa’an roupa foun no obralan, maibé vendedor sira ne’ebé mak fa’an ikan ho na’an agora dadauk iha merkadu Manleuana mamuk ona.
Iha fatin merkadu laran ne’ebé mak mamuk ne’e, komunidade sira balun ne’ebé besik iha merkadu ka okupa merkadu ne’e aproveita hodi kesi sira nian manu, tau fatin lixu no sasan kintu kantu arviru dei’t.
Maibé to’o agora merkadu ne’e seidauk hetan vizita ruma husi Governante sira husi Ministériu ne’ebé relevantes hodi buka solusaun oinsa atu nune’e vendedores sira kontinua fa’an modo, ikan no na’an iha fatin refere.tos
Jornal Nacional