Director Direcção Nacional ba Asuntus Combatentes Libertação Nacional (DNCLN) Joaquim Carvalho de Araújo informa katak, total orsamentu ne’ebé selu ba benefisiáriu sira husi fulan Janeiru to’o ohin loron ne’e, hamutuk $ 97.253.696,84.
“Atu hateten deit katak, total ne’ebé selu iha tinan ne’e maka, hahú husi fulan Janeiru, mai to’o ohin loron, iha territóriu laran tomak, ita selu ona $ 97.253.696,84,” hateten Joaquim de Araújo ba Jornalista iha Edifísiu DNCLN Caicoli Dili, Kuarta (14/10).
Nia hateten, tinan ida ne’e sai ba pensaun $ 31.852, ba benefisiáriu 32.200.
“Iha fulan Janeiru, ita selu ba pensaun ba ema hamutuk 18.533. I benefisiáriu ne’e sai tiha ba 18.747, iha fali fulan Fevereiru ita selu 18.528, ba benefisiáriu sira hamutuk 18.742,”dehan Joaquim de Araújo.
Tuir Joaquim de Araújo katak, iha ne’e iha grau 1, husi pensaun espesiál reforma eskalaun 1, hamutuk ema 220, iha eskalun 1 ne’e, iha mos grau 1, hanesan superior iha ema 34, iha grau 2 médiu 34 pesoas, iha grau 3 inferior ema hamutuk 152, sira ne’ebé laiha intorupsaun, sira ne’e luta durante tinan 24.
Director Joaquim de Araujo salienta liu tan katak, iha mós pensaun espesiál de reforma eskalaun 2, eskalaun 2 ne’e ba sira nia dedikasaun 15 a 19, sira nia dedikasaun 15 ba 19 ne’e hamutuk, ema 523, iha grau 1 superior ne’e iha ema 26, grau 2 médiu iha ema 162, i grau 3 inferior ne’e iha ema 335.
Nia akresenta liu tan katak, agora entre sira ne’e iha mos, pensaun espesiál de reforma ho valór superior distinsaun, ne’e atu hateten deit katak, sira nia valór ne’e la hanesan ho sira seluk, sira nia valór ne’e aas oituan, i sira ne’e atu mate ka moris mós valór ne’e hanesan deit, ne’e iha ema na’in 4. Ezemplu hanesan dadauk ita nia Prezidenti atual, Maijor Jenerál, Mauhunu, ho Maun Lu-Olo, sira ne’e, nia pensaun kada fulan $ 750.
“Ba sira ne’ebé mate, hanesan ita nia saudozu Nicolau Lobato, Saudozu Francisco Xavier do Amaral, Saudozu Nino Conis Santana, Saudozu David Alex Daitula, sira nia valór ne’e moris ho mate hanesan deit,”katak Joaquim de Araújo.
Joaquim Araújo hateten liu tan katak, pensaun subsisténsia 8 a 14, tempu inteiru hamutuk 12.565, grau 1 superior iha ema 45, grau 2 médiu iha ema 828, grau 3 inferior, iha ema hamutuk 11.692.
Joaquim de Araújo akresenta katak, iha mós pensaun subsisténsia para trabalho iha 333, grau 2 médiu iha 14, grau 3 inferiór 319, pensaun de sobrevivénsia benefisiáriu hamutuk,12.386, pensaun sobrevivénsia com valór superior, de distinasaun, 1. No ikus liu ba sira ne’ebé prestasaun pekuniária únika 4 a 7 anos, partisipasaun iha tempu inteiru benefisiáriu hamutuk 6.158.
Iha fatin hanesan Bernardo Amaral hanesan benefisiáriu hateten katak, nia parte sente kontente tanba Governu rekoñese hodi fó pagamentus ba sira nia direitu, tuir luta ne’ebé maka durante sira iha, tanba ne’e nia agradese ba Governu saida maka Governu oferese ona ba sira.
“Osan ne’e maka ami simu husi Governu, ami sente kontente, tanba ho osan ne’e ami mós bele selu ami nia oan sira ba eskola, nomós bele sustenta ami nia familia uma laran,”dehan nia.
Laiha kobransa ilegál
Iha okaziaun ne’e Joaquim Carvalho de Araújo mós deklara katak, durante iha prosesu pagamentu ba benefisiáriu sira, Governu liu husi Ministériu Solidaridade Sosiál (MSS) seidauk halo kobransa ilegál ba sira.
“Ami laiha kobransa, buat hot-hotu, tratamentu hot-hotu ne’e gratuitu, nein centavus ida hodi selu, sé karik ita bo’ot sira iha informasaun katak, iha ema ruma halo kobransa ba benefisiáriu, ou iha faktu ruma, tenki aprezenta ba Ministériu Públiku atu prosesa ema ne’e,” Joaquim Araújo hateten.
Nia hatutan katak, iha ne’e formuláriu saida deit fó gratuitu, tanba Governu iha osan atu kria kondisaun sira hanesan ne’e, seidauk bele ba halo kobransa ba benefisiáriu sira, agora dadaun buat saida deit Governu maka sei selu.
“Sé iha kobransa maka ita taka hela, signifika katak ita hakarak halo buras ida ne’e, entaun sei iha kobransa ruma ita tenki lori ba prosesa tuir dalan legal. Sé nia maka komete ida ne’e, nia ba hatán iha tribunál, justisa iha ba sé deit, kuandu ba kobransa ba ema ne’e, ida ne’e krime ou korupsaun,”katak nia.
Iha fatin hanesan Julita Martins hanesan benefisiáriu hateten katak, durante nia halo tratamentu ba nia dokumentus seidauk iha ema ruma halo kobransa ba sira, i sira mós nunka fó osan ba ema ne’ebé maka durante ne’e trata hela sira nia dokumentus.
“Ami nia dokumentus durante ne’e, ami nunka fó osan ba komisaun sira ne’ebé maka durante ne’e trata ami nia dokumentus, sira mós seidauk husu osan ba ami, ami mos hein hela Governu atu selu ami iha segundu etapa,”dehan nia.eni
Jornal Nacional
