DILI - Organizasaun Naun Govermental (ONG) sira espera tribunál supremu Organizasaun Nasoens Unidas (ONU) nian bele iha nehan kondena Austrália, bainhira laiha nehan, di’ak liu estadu Timor-Leste deside hapara dezenvolvimentu greater sunrise.
“Ami nia solusaun mak ne’e, husik greater sunrise ba jerasaun futuru mak deside, ita la presiza bolu dehanterburu-buru(ansi) hodi dezenvolve sunrise, kazu iha tribunál bele la’o, tenke sukat, tanba ita kazu tolu iha tribunál no gasta ona osan lubuk ida,” afirma Peskijadór Lao Hamutuk, Juvinal Diaz ba Diáriu ne’e iha nia kna’ar fatin, Bebora, Segunda (28/9).
Sosiedade Sivíl sira ko’alia kestaun ne’e tanba governu Timor-Leste la konkorda ho pozisaun governu Austrália ne’ebé hatete katak Austrália iha direitu juridisional absoluta no eskluzivu iha Área Dezenvolvimentu Petrolíferu Konjuntu (JPDA).
Governu Timor-Leste fó ona notifikasaun kona-ba inisiasaun prosesu arbitrazen kona-ba tratadu tasi Timor. Iha notifikasaun ne’e Governu Timor-Leste la konkorda pozisaun Austrália.
Porta Voz Governu, Agio Pereira hasai deklarasaun ofisiál iha loron Kinta (24/09) liu ba hodi hatán ba polítika governu Austrália nian kona-ba tratadu iha Tasi Timor.
Peskijadór hosi Lao Hamutuk, Juvinal Diaz konkorda pozisaun estadu TL hodi lori Austrália ba tribunál arbitrazen internasionál hodi define loloos frontreira tasi entre rai rua nian.
Maibé Lao Hamutuk husu ba estadu tenke esplika tribunál ida ne’ebé TL lori ba.
“Tanba tribunál International Court of Justice nian, Austrália labele hetan legalby endingkatak bainhira tribunál deside katak Austrália sala mós, Austrália dehan ami labele tuir, tanba Austrália la’ós parte hosi prosesu rezolve frontreira tasi ho mandatóriu nian, entaun Timor-Leste bele lori Austrália ba tribunál maibé tribunál iha nehan karik, entaun di’ak, hodi fó presaun ba Austrália,” Peskijadór Lao Hamutuk, Juvinal Diaz informa ba Diáriu ne’e iha nia kna’ar fatin, Bebora, Segunda (28/9).
Nia dehan, bainhira tribunál deside a favor ba TL, maibé Austrália la konkorda, entaun TL lakon rekursu lubuk.
“Tanba, ba tribunál tenke selu advogadu lubuk, tenke prepara buat barak, maibé em prinsipiu di’ak, tanba estadu Timor tenke reklama nia direitu soberania tasi nian,”tenik nia.
Tuir nia, luta ba frontreira marítima ne’e hanesan luta ida ne’ebé komplexu oitan, tanba luta ida ne’ebé lori prosesu naruk liu.
“Luta ida ne’e manan Austrália la’ós lori ba tribunál de’it, luta atu manan labele ko’alia de’it iha mídia, maibé luta ida ne’ebé tenke hahú dezenvolve rai laran rasik,”katak nia.
Nia fó hanoin ba governu labele dependensia maka’as ba rendimentu hosi mina-rai, maibé governu tenke fornese moris di’ak ba povu hosi diversifikasaun setór importante hanesan agrikultura.
“Ha’u nia tauk mak governu gasta osan barak liu, korrupsaun maka’as liu, osan gasta arbiru de’it, mina Kitan maran ona, governu lakohi ko’alia, produsaun Bayu Undan ne’ebé menus ona, governu lakohi ko’alia. Ita nia problema rendimentu sustentável iha fundu petrolíru agora menus liu, governu la brani atu ko’alia,”dehan Peskijadór Lao Hamutuk ne’e.
Nia dehan, oras ne’e orsamentu estadu la sustentável ona. Ida ne’e mak sai problema bo’ot liu ba governu.
“Ami nia hanoin, frontreira marírima buat prinsipal ida, maibé jere finansas estadu ne’e mak prinsipal liu, tanba ho forsa ekonómiku de’it mak Timor-Leste bele avansa ba oin, polítika de’it labele,”Nia fó hanoin.
Nia dehan, bainhira Austrália la rezolve disputa frontreira tasi ho rezolusaun mandatóriu UNCLOS, solusaun mak negosiasaun bilateral.
“Ami prespektiva negosiasaun bilateral ne’e afavor liu ba Austrália du ke Timor-Leste, tanba Austrália poder ekonómiku ho polítika maka’as liu, tanba Austrália hakarak haluan tan ninia área marítima,”tenik Juvinal.
Tuir nia, nasaun Jigante Austrália bosok ten, tanba bosok rai ki’ik no kiak sira iha mundu ho malorek de’it.
“Sira nia bosok ne’e la subar, entaun ba ami nia hanoin solusaun halo negosiasaun ho Austrália duni, maibé ho dalan ida ne’ebé estratéjiku liu maka lalika uza kakutak fokus liu ba mina Timor, lalika asuntu mina ne’e bo’ot liu iha frontreira marítima, bele deskuti, maibé labele kahur ho mina-rai,”
Nia hatutan, governu tenke diversifika ona setór agrikultura (setór produtivu) hodi loke kampu servisu no hadia tan kualidade edukasaun inklui setór saúde.(vas)
Timor Post
