DILI – Numeru moras HIV/SIDA kontinua aumenta ba bebeik no hamate mos ema lubuk ida impaktu hosi seksu livre, tanba nee mosu hanoin balun katak dalan ida mak legalize fatin prostitusaun, nunee fasil kontrola maibe parte Igreja la aseita ho hanoin ida nee.
Tuir Amu Bispu Diosece Maliana Dom Norberto Amaral, ba Jornalista sira iha Igreja Catedral Sesta (4/09) depois remata diriji misa ba korementan Nasional hatete katak povu TL maioria Katolika, tanba nee se legalize fatin prostitusaun maka kontra ona moral Igreja nian.
Ba hau nudar katoliku neebe mak maioria iha Timor Leste atu legalize fatin prostitusaun nee la diak tanba buat ida prostitusaun nee hasoru ita nia moral katoliku nian, agora se hasoru ona ita nia moral ba legalize fali buat ida nee halo saida. Atu redus Moras HIV/SIDA nee husu ba sarani hotu ninia kesadaran penuh ba ida-ida nia an atu labele halo relasaun sexsual arbiru se la hatene koidadu an diak liu labele halo relasaun seksual, tanba laos nafsu deit hodi rabat malu arbiru deit iha neeba depois moras kona mak foin baku rentos,” hatete D. Norberto.
Amu Bispo Diosece Maliana nee hatutan nudar ema sarani tenke hatur an ho diak no tuir Amu Norberto liu hosi kondom mos sei la rejolve ou prevene moras HIV/SIDA, maibe atu promove fali seksu livre iha rai ida nee.
Iha fatin hanesan Sekretariu Estadu Joventude no Desportu (SEJD), Leovigildio Hornai, mos hatete katak governu seidauk iha hanoin atu legalize fatin prostitusaun, maibe governu kontinua halo sosializasaun hodi bele prevene ema hotu hosi moras HIV/SIDA. Informasaun kompletu iha STL Jornal no STL Web, edisaun Sabado (5/9/2015). Thomas Sanches
Suara Timor Lorosae