DÍLI - Timor-Leste nudar nasaun ne’ebé mak riku ba iha turismu tanba tuir levantamentu Ministeriu Turismu ba iha situs turistiku sira iha rai laran hatudu katak Timor-Leste iha fatin barak pontensial ba iha Turistiku hanesan ezemplu Kristu rei no Sao Paulo ne’ebé oras ne’e sasan balun at maibe laiha manutensaun. Fatin turismu Kristu Rei no Sao Paulo nudar fatin Importante tebes ba iha Timor-Leste maibe kondisaun balun hahu at ona liu-liu lampu nomos Sintina, governu rasik la iha atensaun atu bele hadia tanba la preve orsamentu ba iha manutensaun rasik.
“Fatin turistiku sira iha Kristu rei no Sao Paulo ne’ebé balun at, ita hanoin atu halo manutensaun maibe ita boot sira hatene katak iha ita nia lei aprovisionamentu laiha orsamentu ida ba atu halo rehabilitasaun tanba orsamentu 100% projetu ida fo ba 10% sai hela ba iha adisional ba manuntesaun kuandu durante fulan nen (6) ba hadiak no osan sira ne’e hotu no bainhira at fila fali ita laiha orsamentu atu ba halo manutensaun,” dehan diretór Jeral Ministeriu Turismu, Silvino Sampaio ba Jornalista sira iha Salaun enkontru Hotel Novo Turismu tersa (11/08).
Tan ne’e atu halo manutensaun kada fulan 6 governu tenke hadia lei aprovisionamentu ne’ebé iha no tenke iha politika ida oinsa mak preve orsamentu ruma bainhira buat ruma at. “Iha ita nia lei aprovisionamentu mos tenke haree ida ne’e tanba se karik halo projetu ruma ita tenke hanoin prefe orsamentu ba iha manutensaun maibe ida ne’e laiha tan ne’e ita tenke halo tuir kapasidade ne’ebé mak iha,” dehan nia. Nia afrima katak durante ne’e orsamentu ba iha manutensaun laiha maibe Ministru Industria arte no Kultura kontinua buka dalan oinsa mak asegura fatin sira ne’e liu husi sensibilizasaun ba iha Komunidade sira.
“Ita hotu hatene katak fatin sira ne’e iha buat barak mak at tanba hadia tiha at fila fali no hadia at fila fali laos problema ba ita maibe importante sensebiliza ba iha komunidade sira atu bele uza sasan sira ne’e laos han soe arbiru iha fatin ne’ebé mak tur hodi fo serbisu ba iha ema ne’ebé mak limpeza fatin nee,” hateten Sampaio. Tan ne’e Selvino dehan area turistiku hakarak kontinua furak no diak presiza ema hotu nia resposabilidade hau husi lider to’o iha komunidade hodi kria situasaun no ambiente ne’ebé mak diak hodi bele dala turista sira.
MT kontinua halo Levantamentu Situs turistiku
Alende ne’e mos Silvino Sampaio informa mos katak oras ne’e dadaun Ministeriu Turismu Kontinua halo levantamentu ba iha situs turistiku iha Timor laran tomak hodi deskobre nafatin fatin turistyiku sira ne’ebé mak iha. “ita halo ona fase preparasaun nomos ita sei finalize situs turististiku sira nee ita sei deskobre hotu iha Timor Laran tomak,” dehan nian.
Timor Leste potensial ho fatin turistiku maibe fatin sira ne’e laos fasil atu too iha ne’eba no fatin balun ne’ebé mak furak teb-tebes dala ruma sei hasoru difikuldade hanesan estrada, elektrisidade nomos komunikasaun. “Tan ne’e ita buka deit halo levantamentu fatin turistiku maibe atu hadia fatin sira ne’e laos kave ba iha ministeriu turismu deit hanesan estrada laos Ministeriu Turismu mak halo, eletrisidade atu tama iha fatin turistiku laos servisu Ministeriu turismu nian no bainhira ita ba hadia fatin ne’e furak tiha maibe sira seluk tenke halo hanesan estrada tenke ba, elektrisidade nomos komunidade presiza hatene kona ba sensibilizasaun ba sira kona ba ambiente turistiku diak no asegura,” katak nia.
Bainhira husu kona bakoordenasaun tuir nia katak durante ne’e kordenasaun entre linha ministeriu sira diak hodi hare ba iha problema sira ne’ebé mak oras nee Timor Leste hanoin atu dezenvolve seitor turismu iha rai laran. “Kona ba kordenasaun ita koordena diak tanba iha buat sira ne’e laos ministeriu turismu deit mak halo buat sira ne’e tanba tenke kordena ba iha Obras publiku, koordena ba iha SEPFOPE, Ministeriu Ambiente no Polisia tanba buat sira ne’e integradu,” hateten nia.
Nia mos informa katak atu dezenvolve seitor turismu iha TL laos deit servisu Governu liu liu Ministeriu Turismu maibe mos institusaun relevantes no partisipasaun sosiadade nomos komunidade hodi bele dezenvolve fatin turistiku iha Timor Leste ho diak liu tan. Tuir Observasaun BT iha Area Kristu rei sasan balun hau at hanesan Lampu ne’ebé mak monta iha area refere balun at nomos uma oan ne’ebé governu halo balun hahu monu maibe governu la fo atensaun hodi hadia sasan hirak nee. (BT)
Business Timor