Ofisiais FALINTIL-Forsa Defeza Timor-Leste (F-FDTL) hamutuk ema na’in 26 ofisialmente passa ona ba vida sivíl liu-hosi seremónia komemorasaun FALINTIL ba dala 40 iha Tasi-Tolu, Díli, Kinta (20/08/2015).
Ofisiais hirak ne’e hetan reformasaun hosi instituisaun F-FDTL tanba ho idade ne’ebé avansadu. Maioria hosi sira ne’e nu’udar gerileiru ne’ebé halo funu durante tinan 24 iha ai-laran kontra okupasaun illegál Indonézia.
Antes reforma, sira balun mós submete ba promosaun diviza, maka hanesan Sarjentu António Costa e Silva “Terra Mau Bulak” promove ba tenenti. Nune’e mós Afonso Cabral “Mate Maka Foti”, Delfim Rangel (Domin Ran), Sarjentu Ajudante Afonso de Jesus (Sanis), Tenente Afonso Soares (Sacalo) no Sarjentu Domingos Gama (Mausalari).
Iha okaziaun ne’e, militár reformadu hirak ne’e mós simu kondekorasaun Medalla Méritu Militares ho grau terseira klase no kuartu klasse. Sira ne’ebé simu medalla terseira klasse ne’e maka Tenenti Afonso Cabral “Mate Maka Foti”, Delfim Rangel (Domin Ran), Sarjentu Ajudante Afonso de Jesus (Sanis), Tenente Afonso Soares (Sacalo) no Sarjentu Custodio Belo “Alin Laek”.
Enkuantu, benefisiáriu ba medalla kuarta klasse maka Segundu Sarjentu Domingos Gama (Mausalari), Segundu Sarjentu Filipe Belo Gama (Railakan), Kabu José Gusmão (Maumesa) no Kabu Manuel Ferreira (Laritin).
Tenenti Terra Mau Bulak maka hanesan reprezenta militár reformadu na’in 26 hodi ofisialmente intrega ninia arma (kilat) marka M-16 ne’ebé durante tinan 24 nia laran hodi defende soberania territoriál iha ai-laran no defende soberania estadu durante tinan 15 iha instituisaun F-FDTL.
“Ne’e povu nia liman kro’at no meik. Ha’u lori duranten tinan 24 hodi halo funu liberta povu no liberta pátria. Agora ha’u intrega. Simu no lori ba hodi bali no kuidadu hodi defende povu, defende nasaun, kria páz no estabilidade,” Terra tatoli liafuan murak bainhira intrega ninia kilat ba estadu.
“Ami Simu, ami lori hodi hatutan hosi jerasaun ba jerasaun hodi tane no satan TL nia soberania, estadu direitu demokrátiku, hodi sai loloos lutu nasaun RDTL, no sai loloos povu nia liman kroat hanesan asuwain funu na’in FALINTIL sira. Viva FALINTIL…! Viva F-FDTL…!,” hatán ofisiál F-FDTL ida ne’ebé reprezenta estadu hodi simu kilat.
Ba jornalista sira, Terra Mau Bulak hateten nia haksolok bainhira reforma tanba iha tinan 24 nia laran serbisu ne’ebé nia asumi todan no mai serbi tan iha instituisaun F-FDTL durante tinan 15 mós todan. Maibé loron ida ohin (20 Agustu 2015), ne’e nia kasu tiha ona todan hirak ne’e.
“Ba jerasaun foun F-FDTL katak ha’u sai ho haksolok no dignidade. Ha’u sei ba hamutuk ho sira ne’ebé kbi’it laek no joven sira ne’ebé maka frustradu, hodi haklaken lia iha sira nia leet para hetan nafatin unidade no páz nune’e ita nia rai ida ne’e bele hetan dezenvolvimentu lalais,” nia promete.
Bainhira iha vida sivíl, Terra tenik, nia halo serbisu tuir ninia kbiit no esperiénsia ne’ebé iha ba organizasaun ka instituisaun ne’ebé presiza ninia tulun.
Aleinde ne’e, Custodio Belo “Ali Laek” ne’ebé mós reformadu hatete katak nia agradese tanba bele hetan buat hotu iha sira nia vida durante tinan 24 nia laran no tinan 15 iha instituisaun F-FDTL .
“Ohin ami husik hela ami nia responsabilidade ba jovens futuru sira iha F-FDTL para sira hatutan. Husu para fó hakmatek no páz ba povu sira iha nasaun laran,” nia dehan.
Nia prontu halo serbisu saida de’it iha vida sivíl karik estadu presiza ninia tulun. Alin Laek dehan bainhira iha vida sivíl, nia sei la’o ho misaun ida atu eduka joven sira para hotu-hotu tau liman para kumpri órden ne’ebé maka mai hosi estadu.
Entretantu, Prezidenti Repúblika, Jenerál Taur Matan Ruak liu-hosi nia deskursu hateten forsas armadas kontinua hafoun án ho jerasaun foun sira liu-hosi reformasaun ba militares 26 hosi eskalaun oi-oin ne’ebé integra iha F-FDTL to’o ohin loron. Durante tinan 15, nia haktuir, militár esperiente sira ne’e serbisu maka’as hodi transforma FALINTIL ba FALINTIL-FDTL. Sira transmiti no fahe esperiénsia valores no prinsípiu FALINTIL nian ba jerasaun foun sira.
“Iha momentu ne’ebé militares hirak ne’e ba reforma, ha’u hakarak lori povu no estadu nia naran manifesta públikamente ita nia rekoñesementu ba serbisu no dedikasaun hosi militár sira ne’e. Agora, sira termina ho onra sira nia kareira militár . Sira merese hetan apoiu ba sira nia integrasaun iha vida sivíl. Tanba sira sei iha responsabilidade atu kontinua fó kontribuisaun ba ita nia nasaun,” Taur haklaken.
Xefi Estadu informa labele haluha lisoens ne’ebé ita hetan iha ita nia istória. Valores sira ne’ebé ita apriende iha funu laran sai hanesan rikusoin ida instituisaun militár no nasaun nian. Valores sira ne’e nia forsa maka lori vitória independénsia nian mai ita.
Taur hatutan katak presiza hametin unidade no haforsa konfiansa povu nian ba instituisaun militár no sivíl sira. Agora, tuir nia, prinsipál kombate F-FDTL ninian maka dezenvolve án no aumenta kompeténsia téknika no profisionalizmu para kumpri mandatu ne’ebé maka Konstituisaun fó hodi garante independénsia, integradade territorial, liberdade no seguransa povu nian. (Ekipa Matadalan)