ALAS - Polísia Nasíonal Timor-Leste (PNTL) Esquadra Postu Administrativu Alas, Munisípiu Manufahi to’o agora sei falta ekipamentus, nune’e difikulta tebes serbisu. Ekipamentus hanesan transporte Kareta, Motorizada, Radio kontaktu laiha nune’e, susar sira atu halo kontrolu ba area ne’ebé mak iha Postu Alas. Tanba area Postu Alas luan teb-tebes porvolta 46,69 kilo metru nune’e difikulta tebes atu halo kontrolu Suku no Aldeia ne’ebé mak iha Postu Alas. Hateten Komandante PNTL Esquadra Postu Administrativu Alas Francisco L. Alberto ba STL iha Centru Komunitariu Besus Alas, Sesta (14/8/2015).
Francisco, esplika liutan katak tuir los Komandu la fó autoriza ami atu fo informasaun maibé ita boot sira to’o ona mai haree rasik, tanba area Postu Alas luan 46,69 kilo metru. Komandante PNTL Postu Alas ne’e salenta liutan katak prekupasaun hirak ne’e sira hato’o dala barak ona, tanba foin dadauk Parlamentu Nasional (PN) Komisaun F no Komisaun E mai to’o ne’e sira informa tiha ona maibé situasaun mak hanesan ne’e. Nia salenta liutan katak ba oin prezisa Komandu Jeral ou Ministeriu Interior fó importansia, tanba sira nia area ne’e luan tebe-tebes ne’e duni duni susar ba sira atu halo kontrola ba Suku no Aldeia ne’ebé mak iha Suku lima (5), Postu Administrativu Alas.
Antes ne’e, tuir Membru Parlamentu Nasional, Komisaun F Leonel Marçal katak, PNTL iha Postu Administrativu Alas laiha ekipamentus, hanesan transporte kareta, motorizada, radio komunikasaun no hela fatin laiha, ida ne’e impedementu bo’ot ba polísia sira atu hala’o sira nia knar ho diak.
Prekupasaun hirak ne’e Membru PN ne’e husu ba Sekretariu Estadu Asuntu Parlamentar Teresinha Maria Viegas atu hato’o ba Komandu Jeral no Ministeriu Interior oinsa atu fó importansia ba preokupasaun ne’e. Tanba tinan-tinan PN aprova orsamentu aloka ba PNTL, maibé to’o agora ekipamentus ba PNTL laiha.
Nune’e mós Membru PN Komisaun B Adriano João hateten, ba fatin PNTL sira nia preokupasaun hanesan sira nia falta ekipamentus transporte, radio komunikasaun. Ida ne’e, ba oin perzisa Komandu Jerál PNTL no Ministeriu Interior fó atensaun, tanba PNTL sira ne’e siguransa nasaun RDTL nian.
Suara Timor Lorosae, loron Tersa, 18 Agostu 2015 – Foto: Logo PNTL