Agênsia Dezenvolvimento Nacional (ADN), instituisaun ida nebe Primeiru Ministru Kuatru no Kintu Governu konstitusional kria hodi halo kontrola projetus Fiziku sira governu nian nebe ezekuta husi Kompanhia nasional no internasional sira.
ADN asumi papel importante atu bele kontrola projetu sira governu nian atu nunee kompanhia sira ezekuta projetu sira nee tuir Bill of Quantity (BOQ) no mos asegura kualidade projetu antes haruka governu selu projetu sira nee.
Durante esistensia ADN konsege hatama fila fali osan estadu nian ba kofre Estadu tamba kompanhia barak mak ezekuta projetu laiha kualidade, projetu sira la atinji 100 porcento, no mos sobu projetu barak nebe la tuir BOQ.
Maske nunee ADN mos sae obstaklu ba kompanhia sira, alem de kontrola kompanhia sira ho rigoruzu maibe mos sai fukun ba atrazu pagamentu ba projetu sira nebe kompanhia sira finaliza ona ho kualidade.
Emprezario sira lamenta ba prosesu sira iha ADN tamba pagamentu nebe tarde teb-tebes halo kompanhia sira ohin loron moris ho tuasan eh pior liu tan katak pagamentu nebe tarde nee halo kompanhia sira laos finaliza lalais projetu maibe abandona projetu.
Laos deit tusan barak, karik koko vizita ba fatin empinha ‘ Pegadaian’ sira iha Dili laran nee kuaze kareta empresario sira nian mak empinha barak liu fatin empinha sasan sira nee, se husu razaun laos buat seluk, osan laiha atu selu funsionariu no uza ba halo servisu projetu nian.
“Ami nia kolega balun ne’ebe manan projetu Estadu nian seidauk hetan pagamentu to’o kedas fulan 8 ona no balun tinan tan ona, ami iha dokumentus atu komprova situasaun ne’e”.Oscar Lima.
Los duni senhor, nudar aman ba emprezario sira tenki koalia makaas, lori aspirasaun empresario sira nee ba Xefi Governu atu bele konsidera eh situasaun sira hanesan nee la bele esiste, se lae governu laos fasilita seitor privadu maibe kehe rai kuak hodi hakoi moris empresario nasional sira nee.
Governu dala barak ejiji kompanhia sira atu finaliza projetu tuir kaldenariu maibe kompanhia sira obriga an finaliza tiha projetu sira nee ikus mai Obras Publikas ho ADN la prosesa lalais pagamentu, nee mos injustisa boot ida.
Karik publiku sei lembra, iha tinan kotuk Obras Publika lansa prakualifikasaun ba kompanhia sira nebe iha kapasidade rekursu humanus ( teknikus) ekipamentus no finansial hetan kualifikasaun A, B, C etc. Lansamentu ba prakualifikasaun nee kompanhia sira nebe priense rekezitus hodi hetan kategora melhor kualifikasaun, espera katak governu iha hanoin diak atu hadia maibe se insituisaun sira ADN, parte governu – Obras Publika no Ministeriu Finansas laiha vontade diak oinsa bele fasilita seitor privadu sira nee mak susar atu bele hetan metas ba apoiu dezenvolve seitor privado sira iha Timor Leste.
Dadaun nee esiste mos CNA, instituisaun nasional ida nebe toma konaba ba aprovisionamentu iha mos Agensia Dezenvolvimentu Nasional, instituisaun rua nebe kuaze halao knar ida nebe hanesan, karik nee mak fator ida impendementu, diak liu taka ida, ADN ou CNA atu nunee bele hafasil prosesu pagamentu ba komapnhia sira.*