Prezidente Repúblika Taur Matan Ruak konkorda ona António da Conçeição troka saudozu Fernando La-Sama de Araújo nia fatin, hanesan Ministru Estadu Koordenadór Asuntu Sosiál no Ministru Edukasaun, no nomeia fali Vice Ministru Costancio Pinto sa’e ba Ministru Comersio Industria e Ambiente.
Primeiru Ministru Rui Maria de Araújo, Segunda (03/08) horseik aprezenta ba Prezidente da Repúblika, Taur Matan Ruak, kandidatu ne’ebé Governu hili ona husi kandidatu sira lubuk ida ne’ebé mak Partidu Demokratiku propoin ba Governu, hodi Xefe Estadu ne’e bele tetu.
Maibé Prezidente Repúblika Taur Matan Ruak laiha objesaun ba António da Conçeição, Constâncio Pinto inklui Nino Pereira, hodi priense hika’as fatin ne’ebé sei mamuk.
Primeiru Ministru Rui Maria de Araújo informa katak, kandidatu hirak ne’e, aprezenta ba Xefe Estadu, bazeia ba dialogu polítiku ne’ebé Prezidente CNRT, Kay Rala Xanana Gusmão hamutuk ho Prezidente Ezersísiu PD, Adriano do Nascimento ho Sekretáriu Jerál PD, Mariano Assanami Sabino.
“Sira koalia hotu propoin naran, entaun ho baze ba proposta sira ne’e hotu, lori mai aprezenta ba Prezidente, Sr. Prezidente konkorda katak, atu nomeia ba Ministru Estadu, Koordenadór Asuntu Sosiais e Ministru Edukasaun maka António Conçeição, e depois Vise Ministru Constâncio pinto hetan fali nomeiasaun hanesan Ministru, depois PD mós propoin Nino Pereira ba fali Vise Ministru Komérsiu, Indústria no Ambiente,” informa PM Rui Maria de Araújo ba jornalista sira hafoin hasoru malu ho Prezidente Repúblika Taur Matan Ruak, iha Palásiu Prezidensial, Aitarak-Laran, Segunda (03/08).
Xefe Governu ne’e dehan, Prezidente da Repúblika laiha objesaun ba kandidatu hirak ne’e, tanba governasaun ne’e hela de’it tinan ida resin, entaun presiza ema ne’ebé koñese nanis ona sistema governasaun.
“Kritéria importante ne’ebé , ha’u nu’udar Xefe do Governu hato’o ba Prezidente CNRT no mós ba lideres Partidu Demokratiku nian katak, tanba governasaun ne’e hela de’it tinan ida resin, entaun presiza ema ne’ebé koñese ona sistema, ema ne’ebé involvidu ona iha prosesu governasaun, hatene ona sistema husi laran, para depois la presiza tan lakon tempu atu mai tenke liu fali husi prosesu orientasaun, e depois tenke buka hatene fali fali,”katak Rui Araújo.
Xefe Estadu sei marka data, nune’e fó pose ba ema ne’ebé asume nu’uar membru orgaun ezekutivu iha VI Governu Konstituisionál.
Iha parte seluk, António da Conçeição sente hakfodak, tanba nia seidauk hatene katak, Estadu atu nomeia nia atu asume fali kargu Ministru Estadu Koordenador Asuntu Sosial no Ministru Edukasaun.
Antonio da Conceição dehan, nia sente todan, tanba Ministériu edukasaun ne’e, komplikadu tebes.
“Ha’u sente todan, tanba ha’u mós hahú hela ha’u nia projetus sira ne’ebé mak importante tebes iha ministériu ida ne’e, la’os projetu bai-bain, mas obra sira ne’ebé mak ita hanoin barak looos, sei nesesita tebes ha’u nia prezensa. Ha’u hakarak tebes atu hahú ha’u nia misaun iha ne’e. Agora hanesan servidór do estadu, ha’u sei obedese ba ha’u nia superior hierarkia señor Primeiru Ministru saida mak nia bele hola desizaun ba ha’u,”katak António da Conçeição.
Maibé Antonio dehan, maske nia senti todan, maibé nia hein de’it desizaun Estadu nian atu muda nia kargu husi husi Ministru MCIA ba Ministru Estadu, Koordenadór Asuntu Sosiais, no Ministru Edukasaun.
“Ha’u dehan katak, sé ha’u obedese ne’e, ha’u labele obedese buat ba iha ne’ebá. Iha ne’eba mós dezafiu bo’ot ida, Ministériu Edukasaun ida ne’ebé ema dehan komplikadu tebes. La’os dehan ita koalia meja, kadeira laiha, la’os problema ida ne’e mak importante liu,”katak nia.
Maibé António dehan, kestaun meja no kalteiras laiha ne’e, hanesan fasilidade ida ne’ebé mak atu kompleta alunus, nune’e fasilita iha prosesu aprendijazen.
Nia afirma, koalia kona-ba edukasaun tenke garante kualidade edukasaun ida ne’ebé asegura estudante sira nia futuru.
“Ha’u sente hanesan dezafiu bo’ot ida, tanba ha’u rasik seidauk involvidu iha iha área edukasaun ne’e, maske ha’u estuda oituan filozofia edukasaun, ha’u mós mai husi filsafat, estuda kona-ba asuntu estratéjiku sira intermus de konseptu dezenvolvimentu, ha’u iha,”relata António.
Maibé António dehan, la signifika teoria ne’ebé nia aprende ne’e, atu aplika kedas iha Ministériu Edukasaun.
“Ha’u labele lai kona-ba prioridade, tanba informasaun ne’e ha’u hetan husi imi (jornalista), tanba buat ne’ebé loos liu, ha’u tenke rona husi Primeiru Ministru,”afirma António.
Nia haktuir, se nia (António) mak hetan duni fiar atu troka saudozu La Sama , nia sei haree uluk kapasidade iha ministeriu nia laran, rekursu umanu ne’ebé ejiste ona, kapasidade finanseira ne’ebé atu dispoin, nune’e realiza mehi iha Ministériu Edukasaun.
Antes ne’e, Partidu Demokratiku aprezenta kandidatu nain 10 ba Primeiru Ministru Rui Maria de Araújo, maibé Xefe Governu hili António da Conçeição atual Ministru Komérisu Indústria e Ambiente, atu troka La Sama nu’udar Ministru Estadu, Koordenadór Asuntu Sosiais, no Ministru Edukasaun.cos/avi
Jornal Nacional