DÍLI - Xefi Estadu Maior das FALINTIL-Forsa Defesa Timor-Leste (F-FDTL), Maijor Jeneral Lere Anan Timor hatete, lei laiha atu proteje lider nasionál sira ba futuru, nasaun ne’e sei nakdoko.
“Ita hanesan rezistensia ida, kuandu laiha lei ida proteje ita nia lider nasionál, aban bainrua ita nia nasaun la-hakmatek”, Lere ba jornalista iha Hera, Sesta, (31/7).
Nia hatutan, hanesan agora dadauk ema akuza Xanana Gusmão nudar lider FALINTIL nian atu ba tribunál nudar arguidu ida ne’e mos problema bo’ot ida. “Ita nia maun bo’ot Xanana atu ba tribunál hanesan arguidu ne’e problema ida”, eis gerileiru ne’e hatutan.
Antes ne’e tuir sosidade sivil sira nia haree, hosi evidensia mak mosu iha audensia produsaun de provas iha julgamentu tribunál Díli, loos duni desizaun haruka kurir droga nain lima fila ne’e orientasaun mai hosi eis Primeiru Ministru ne’e. Tan ne’e, sosidade sivil hein tribunál iha korajen no brani hasai sertidaun extraia ba ministériu públiku investiga sasin refere.
“Mais agora ho progresu tribunál apresia pedidu ministériu públiku hasai sertidaun extraia, investiga eis PM ne’e ba nasaun do direitu demokratiku ne’e notisia furak tebes katak, ita nia tribunál implementa duni prinsipiu artigu 16 konstituisaun RDTL katak, ema hotu iha lei nia oin hanesan,” Diretór AJAR José Luis Oliveira ba TP iha edifisu ONG Belun Farol, Tersa, (28/7).
Tribunál Distritu Díli liu-hosi juiz prezidente José Maria Araujo apresia pedidu ministériu públiku ne’ebé husu tribunál hasai sertidão extraia para investiga sasin Kay Rala Xanana Gusmão ne’ebé iha loron 2 Jullu deklara iha tribunál deporta kurir droga nain lima ba Indonézia bazeia ba desizaun governu. (way)
Timor Post