DILI – Fulan tolu nia laran F-FDTL no PNTL halo opearsaun hasoru grupu KRM, maibe laiha rejultadu no ikus mai tenke retira.
Tuir Adjuntu Diretor Organijasuan Non Govermental Fundasaun Mahein (FM), Joao Almeida, ba STL iha ninia servisu fatin Comoro Sigunda (03/08) hatete operasaun neebe halo hosi F-FDTL no PNTL nee lao tuir rejolusaun maibe seidauk iha nia rejultadu positive.
Operasaun nee atu buka tuir lider KRM neebe mak halo instabilidade iha rai laran no operasaun nee lao ho rigiroju no dala barak mos mosu violasaun direitus humanus no iha operasaun nee kaptura duni membru KRM balu maibe too agora ita la hatene Mauk Moruk nia paradeiru tanba nee ita labele hatete katak operasaun nee iha duni seriedade ga lae no ita hare operasaun nee seriu duni maibe seidauk iha nia rejultadu tanba ema importante neebe estadu buka seidauk kaptura ou intrega an,” dehan Joao.
Nia hatutan iha meius barak mak atu uja hodi bele detekta paradeiru Mauk Moruk maibe fila fali ba autoriade responsavel atu uza meius oin-oin neebe mak modern, hodi bele detekta hanesan liu hosi telekomonikasaun nomos satelit, laos nee deit meus ida mak liu hosi dalan dialogu no dame.
Iha fatin ketak tuir Diretor Ezekutivu Asosiasaun HAK, Manuel Monteiro, mos hatete kazu Mauk Moruk nee kazu politiku tanba nee tenke rejolve ho politika, maibe kuandu kahur ho kazu krime maka sei la hetan nia solusaun. Informasaun kompletu iha STL Jornal no STL Web, edisaun Tersa (4/8/2015). Thomas Sanches
Suara Timor Lorosae