DILI - Reitór foun Universidade Nasionál Timor Lorosa’e (UNTL) eleitu Francisco Miguel Martins ba periode 2016 to’o 2020 hatete, nia sei implementa programa 15 iha nia mandatu tinan haat.
“Planeamentu jestaun institusionál, konstrusaun ajenda akademika, sustentabilidade, polítika de kaulifikasaun valorizasaun dos servidores, extensaun, peskiza kriasaun no inovasaun assistensia estudantil, institusionalizasaun, komunikasaun, meiu ambiente, implantasaun, institusionalizasaun implementasaun sistema de auditoria internal das administrasaun no finansas, kriasaun de novas unidades organizasaun no administrativu no ikus kooperasaun nasionál no internasionál, programa ne’e mak ha’u sei hala’o iha ha’u nia mandatu”, Francisco Martins ba Timor Pos iha Kampus Ekonomia Liceu Díli, Kinta, (30/7).
Reitor eleitu hatutan, aprejenta ona programa sira ne’e ba Konsellu Jéral UNTL nomos públiku hotu haree no hatene ona ne’e, mais la’os nia mesak mak atu servisu, maibé iha kolaborasaun ho parte hotu iha instituisaun laran.
“Programa sira ne’e ha’u sei kolabora hamutuk ho profeseres, dosente, administrativu no estudante sira hotu atu alkansa programa sira ne’e iha ha’u nia mandatu, maibé programa sira ne’e ita la’os halo dala ida, faze por faze nune’e hodi bele atinji objetivu”, nia tenik.
Francisco salienta, durante ne’e sei hanoin atu harii eskola balun iha munisipiu sira nune’e bele muda estudante sira hosi fakuldade agrikultur nomos politekniku nomos programa seluk.
“Ha’u hakarak hatete eleisaun ne’e planeadu hosi Prezidente Konsellu Jéral UNTL nian Madre Guilermina Marçal ho ninia ekipa ne’ebé eleisaun ne’e la’o ho demokratiku tebes, ida ne’e mak hatudu ba publiku hotu, kompara fali ho fatin seluk ida ne’e mak uniku, transparansia”, esplika nia.
Kandidatu seluk ne’ebé kompete ho reitór eleitu mak atual reitór Aurelio Guterres liu-hosi dalan demokrasia. Membru konsellu jéral 12 mak tuir eleisaun refere ho rezultadu votus 10 ba reitór eleitu no votus rua ba atual reitór. (fer)
Timor Post