Dosente Filozofia Polítika Semináriu Maior Fatumeta, Pe. Martinho Gusmão hatete povu ladun interese ba passadu tanba passadu ne’e ema barak át liu Mauk Moruk, maibé agora ita simu. Tanba ne’e, nia prefere realiza diálogu ho Mauk Moruk atu solusiona problema.
“Ema balun ne’ebé uluk kaer manu-tolun dois tuda Bispu Belo, ikus mai sai membru FRETILIN serbisu iha ZEESM, ka sai membru partidu Congresso Reconstrucção de Timor (CNRT) sai membru Governu, ne’e karik di’ak?,” Amu Martinho Gusmão(AMG) dehan ba Matadalan (MTD) iha nia kna’ar fatin liu-hosi entrevista eskluzivu iha Kinta (23/07/2015).
MTD: Amu nia haree ba operasaun hasoru Mauk Moruk ne’e oinsá?
AMG: Iha problema kona-ba sentimentu no pensamentu polítiku. Hosi aspeitu polítiku, ema hotu ne’ebé involve iha konflitu ida ne’e, protagonista ka antagonista, kotu iha dalan klaran. Iha parte ida, ita nia Estadu foti desizaun atu halo operasaun. Iha parte seluk, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) iha sentimentu pessoál atu lakohi halo kanek malu.
Ha’u hanoin, kazu Petisionáriu sai lisaun todan ba ita hotu. To’o agora, problema ne’e tara hela de’it. Ema mós hanoin ona, duké sira sokar lia, ita ki’ik sira maka tata rai, di’ak liu “cuek” tiha de’it.
MTD: Tuir Amu nia hanoin, karik kazu ida ne’e eskenáriu polítika ema boot sira nian?
AMG: Ha’u la hatene. Maibé, buat ne’ebé ha’u bele haree ita hasoru hela “disobediencia civil” ida. Iha polítika, bainhira ema halo aparatus estadu balun halo “disobediencia civil” hatudu katak maski iha órden no lei, maibé sira hili atu halo ho “laran rua-rua” ka bahasa karik dehan “laksanakan dengan setengah hati”. Dizobediensia sivíl ne’e assuntu morál, katak, maski lei ne’e loos, maibé laran maka la di’ak atu halo.
MTD: Iha parte ida, estadu konsidera Grupu Mauk Moruk (MM) hanesan inimigu ida. Iha parte seluk, estadu rasik maka nomeia Dr. José Ramos Horta atu fasilita diálogu ho Mauk Moruk. Amu nia komentáriu?
AMG: Ha’u hanoin diálogu di’ak liu. Tan nu’udar sarani, Amu Papa Francisco dehan sarani tenki REVOLUCIONARIO. Nia ko’alia kona-ba REVOLUCIONARIO DA TERNURA … Sé agora Estadu sai hosi INIMIGO ba DIÁLOGU, ne’e maka revolusaun da ternura … Ha’u konkorda.
Purké, MM mós iha razaun ruma karik. Keta dehan, Estadu de’it maka iha razaun. Tan iha assuntu balun ne’ebé MM propoin ne’e crucial no fundamentál. Injustisa no krime organizadu mós estadu halo karik.
Ita haree de’it kazu hanesan Zona Espesiál Ekonomia Sosiál Merkadu (ZEESM). Ne’e ideia brillante maibé la’os buat loos. Tan halo diskriminasaun ne’ebé halo isin fulun hamriik hotu.
Lei Pensaun Vitalísia (LPV) mós kazu seluk ne’ebé diskriminativu. Ne’e “krime” ida. Sé ita nia estadu halo krime “legalizado” ita husik de’it, depois ita ba fali kasa ema ne’ebé halo sala ki’ik oan ida ita halo drama boot.
Ha’u prefere diálogu. Franka no aberta. Lalika lai lori TVTL atu halo transmisaun direta. Husik partikularidade balun hela iha “confessionario” laran. Hasai assuntu ne’ebé bele lori ba konsensu nasionál. Uluk MM halo sala. Ha’u mós hatene tan ami iha Baucau hatene sasán sira hosi ki’ik kedas. Maibé, iha ema balun ne’ebé uluk kaer manu-tolun dois tuda Bispu Belo, ikus mai sai membru FRETILIN serbisu iha ZEESM, ka sai membru CNRT sai membru Governu, ne’e karik di’ak?
MTD: Amu, nusa antes ne’e la buka diálogu de’it maibé agora uza fali forma ne’ebé rezulta vítima barak iha terenu no gasta osan 2 miloins?
AMG: Ha-ha-ha. Iha moris ita tenki hola risku. Sai polítiku ne’e hola risku. Ne’e maka Soeharto dehan ho bahasa Jawa JER BESUKI MOWO BEWO… Kalau ingin berhasil, harus brani tanggung biaya.
Baibain, “Jer besuki” ne’e refere ba ema boot sira. Depois “mowo beyo”, tanggung biaya atu mate maka povu. Osan povu nian. Susar no terus mós povu. So what githu lho.
MTD: Amu, diálogu oinsá sé MM mós komete ona krime balun?
AMG: Kona-ba krime ita la halo diálogu. Diálogu la’os atu kansela krime. Diálogu labele sai laundry.
MTD: Oinsá bele diálogu sé MM nia paradeiru ita la hatene. Agora, sé maka bele aprosima MM atu tún mai bele halo diálogu?
AMG: Nia la hela iha fitun ka fulan. Timor ne’e ema barak hatene ninia paradeiru…
MTD: Tuir Amu nia hanoin, sé maka marese atu sai fasilitadór ba diálogu ne’e?
AMG: Ida ne’e tenki konsensu hosi MM no estadu. Depois tópiku mós iha konsensu. Labele toka problema krime. Maibé, haree ba kestaun morál polítika.
MTD: Pessoalmente, Amu nia haree, figura ne’ebé maka di’ak atu fasilita diálogu ne’e?
AMG: Ha’u hanoin, Dr. Rui Maria Araujo.
MTD: Tanbasá Amu prefere Dr. Rui?
AMG: Tan ha’u koñese nia pessoalmente.
MTD: Tanbasa la’os premiadu Nobel da Páz na’in rua, Don Carlos no Dr. Ramos Horta tuir ezijensia veteranu Cornélio Gama L7?
AMG: Hmm… Difisil liu.
MTD: Tanbasa difisil Amu?
AMG: Dom Carlos labele mai. Dr. Ramos Horta sidi barak demais ho Xanana Gusmão (XG), Marí Alkatiri (MA) no Taur Matan Ruak (TMR). Pode ser difisil. Maibé, Dr. Rui Maria de Araújo (RMA) sai fasilitadór, nia bele lori Don Carlos no RHM nu’udar forsa morál. Importante, Estadu labele “ausente”. Sé lae, ita estraga Estadu nia dignidade. PN labele ona, tan la reprezenta ona povu karik. Agora ita salva lai Governu no Prezidénsia Repúblika. Ne’eduni, agora Taur Matan Ruak ho Rui Maria Araújo maka hamrik iha oin.
MTD: Amu, MM mai atu diálogu ho governu. Sé RMA sai fasilitadór tiha entaun MM mai diálogu fali ho sé?
AMG: Ninia problema ho governu ka ninia problema ho Estadu? Nufundu, MM tenki aseita katak nia sidadaun ne’ebé hakarak hadi’ak situasaun polítika iha Timor-Leste. Agora, sé maka tenki sai uma na’in ne’e tenki órgaun Estadu. Sé ita la hanoin ho skema polítika hanesan ne’e ita sei estraga sistema Estadu Timor-Leste. Hanesan agora iha Oe-Cusse, ne’e projetu atu estraga sistema Estadu. Sé MM hakarak ida ne’e mosu (?) entaun lalika diálogu ida.
Ha’u suporta TMR no RMA maka sai “uma na’in”, maibé limita ba diálogu polítiku no morál. konjela lai órden atu kaptura nia. Depois diálogu hotu tiha, maka ita hatama fali lei no órden.
Ha’u sente MM mós “cavaleiro” ne’ebé hatene hatur nia án iha kontestu polítika estadu nian.
MTD: Karik maka MM kontinua reklama kona-ba kazu passadu, 1983/1984, Amu nia hanoin oinsá? Karik ne’e relevante?
AMG: Ida de’it maka labele tama: kazu krime. De restu diálogu aberta no franka, maibé selesionadu. Povu ladun interese ba passadu tanba passadu ne’e ema barak át liu MM, maibé agora ita simu. povu la preukupa. Passadu sempre passadu. La muda faktu ida: ita ukun rasik án.
MTD: Amu, ema barak preukupa katak MM mai atu halo diálogu ho sé loos? Diálogu ho Xanana ka estadu?
AMG: Entaun objetivu atu diálogu ne’e saida? Sé problema ne’e XG no MM, entaun rezolve uma laran. Lalika lori instrumentu Estadu nian. Sé problema ne’e MM ho Estadu, entaun diálogu polítiku no morál ho Estadu. La’os diálogu ho PNTL ka FFDTL ka Tribunál. Labele kahor be di’ak?!
MTD: Sé diálogu ho Xanana kona-ba kazu passadu, karik Amu aseita ida ne’e?
AMG: No comments. (Anibal)
Matadalan