GLENO - Camara Comercio Industria (CCI) Munisipiu Ermera, sesta 18/06, asina Memorandum of Understanding (MoU) koperasaun ho kompañia rua hanesan kompañia Timorock Techonology System no kompañia HAMA Consultoria hodi fo formasaun no kapasitasaun ba emprezariu sira iha Munisipiu Ermera. Prezidente Camara Comercio Industria Munisipiu Ermera, Luis Alves Tilman (Mauhuno) hateten objektivu estabele MoU ne’e ho kompañia nua ne’e atu buka dala hamutuk ba dezenvolvimentu no haboot kompetitividade iha setor privadu lokal nomos kria ambiente diak liu ba jestaun modernu iha munisipiu Ermera.
Nia dehan liu husi MoU ne’ebé estabele oinsa bele fasilita emprezariu sira iha munisipiu Ermera lao ba oin tanba akordu ho Hama Consultoriu atu fo kapasitasaun ba iha seitor privadu sira no koperasaun ho TIMOROCK atu hare ba iha produtu organiku ne’ebé hodi halo kontruksaun ba iha estrada sira. Prezidente CCI Munispiu Ermera ne’e afirma katak durasaun ba servisu hamutuk ne’e durante tinan 4 hahu husi 2015 to’o iha 2019 tanba ne’e espera katak liu husi MoU refere sei fo benifisiu ba iha seitor privadu sira iha munisipiu Ermera liu-liu iha area gestaun tanba maioria Seitor privadu nia gestaun sei fraku.
“Mai ita hamutuk iha CCI atu bele lori dezenvolvimentu Ermera ba iha Dezenvolvimentu Sustentavel, tanba ne’e mai ita hamutuk hodi halo koperasaun diak ho entidade sira hotu-hotu ne’ebé iha Munisipiu ida ne’e tantu se deit mak hakarak mai ita loke lima simu”, dehan prezidente ne’e. Nia dehan seitor privadu munisipiu Ermera iha hanoin no komitmentu ida deit hakarak atu dudu dezenvolvimentu lao ba oin ho diak. Iha biban ne’e diretóra Hama Consultoria, Maria de Penha Pacifico hateten Hama Consultoria pronto fo kapasitasaun ba iha seitor privadu iha rai laran liu-liu iha munisipiu Ermera kona ba oinsa atu hadia sira nia planu estratejia, situasaun atual organizasaun, dezafiu emprezariu sira no identifika planu sira.
Maria dehan tan katak liu husi MoU refere oinsa servisu hamutuk hodi kria pontu fokal atu nune’e seitor privadu bele identiifka nesesidade hodi nune’e realiza planu asaun hodi bele lori solusaun to’o iha avaliasaun planu permanente. Iha fatin hanesan administrador Munisipiu Ermera, Joao Mestri Madeira hateten katak loron refere nudar istoria ida ba iha CCI munisipiu Ermera tanba foin mak remodela estrutura konsege iha oportunidade ida diak ba iha seitor privadu Ermera. “Objektivu prisipan ida ba ita tur hamutuk hodi hare ba iha papel ida idak ninian kona ba kontribuisaun ba iha ita nia dezenvolvimentu iha ita nia pais liu-liu iha munisipiu Ermera ,” dehan Administrador munisipiu Ermera ne’e.
Hare ba koperasaun ne’ebé importante atu dezenvolve setor privadu Administrador ne’e lori povu Ermera nia naran husu agradese wain ba iha iha kompañia HAMA Consultoria nomos Kompañia Timorock Teknologi System. Nia dehan save importante ba dezenvolvimentu Ekonomia iha seitor privadu sira nia liman tanba seitor privadu mak sai parseiru ne’ebé importante ba iha governu no governu deit labele hamrik mesak tenke liu husi setor privadu nia kontribuisaun hodi lori dezenvolvimentu ba oin.
“Save importante mak iha setor privadu sira nia liman tanba setor privadu mak parseiru dezenvolvimentu governu nian hodi kontribui ba iha dezenvolvimentu ida ne’e, tanba ne’e atu lori dezenvolvimentu ida ne’e lao ba iha oin tenke iha inisiativa, hau hanoin kapasitasaun importante tebes maske iha frakeza maibe importante tenke hakbiit ita nia kapsidade hodi bele hamoris ita nia negosiu “ dehan nia. Nia husu mos ba orgaun hot-hotu atu serbisu hamutuk no komunidade sira atu serbisu hamutuk mos ho setor privadu hodi bele atinji objetivu ne’ebé mak ema hotu hakarak.
“Depois asina tiha memorando ida ne’e, hau hanoin laos CCI deit mak lao mesak maibe ita hotu apoui bele halo servisu ne’e, ne’e lao ba iha oin tanba dala barak ita harii hela la iha servisu hamtuk buat barak la lao ba oin maibe wainhria servisu hamutuk mak buat hotu sei lao ba oin,” katak nia. Iha fatin hanesan Deputadu Antonio Lima-lima ne’ebé sai hanesan testamuna ba estabelesementu serbisu hamutuk ne’e hateten nudar Ermera oan sempre enkoraja setor privadu atu bele lao ba oin hodi lori dezenvolvimentu ba nasaun.
“Hau mai hanesan tetemunha maibe laos atu kolia maibe hanesan Ermera oan, hau bele kolia tanba ne’e hau husu Ermera tenke unidade, wainhira laiha unidade mak dezenvolvimentu lalao ba oin tan ne’e husu ba iha emprezariu Ermera oan tenke hamutuk hodi lori dezenvolvimentu ba oin,” dehan nia. Nia husu atu emprezariu sira hamutuk hodi lori Ermera sai munisipiu ne’ebé dezenvolvidu tanba bainhira la unidade mak Ermera sei la sai Munisipiu ida ne’ebé dezenvolvidu iha Timor-Leste. “Tan ne’e hau husu ba iha emprezariu tenke unidade hodi lori Ermera ba oin tanba Ermera sei sai munisipiu presiza estrutura, hau durante ne’e sente triste rona Ermera oan sira durante ne’e la hamutuk tan ne’e hau husu ba ita hotu atu bele hamutuk hodi dudu dezenvolvimentu lao ba oin,” dehan nian. (BT)
Business Timor - Pedro