Eis Prezidente Partidu Sosial Demokrata (PSD), Mario Viegas Carrascalão, konsidera Comissão Nacional Eleisões (CNE) hanesan boneka ida, tanba laiha poder atu kontrola partidus politikus sira.
Mario Carrascalão konsidera CNE hanesan boneka, tanba durante ne’e tuir nia haree, CNE laiha poder atu kontrola Partidu Politikus ne’ebé ejiste barak tebes iha nasaun foun ida ne’e, no ida ne’e sai hanesan ameasa bo’ot ida ba Estadu Timor Leste atu hahoris hikas poder politikus, no korrupsaun bele sai buras iha nasaun ne’e.
Pior liutan, ho ejistensia partidu politik foun sira ne’ebé foin mosu ne’e, fó kauza bo’ot iha eleisaun jeral, hodi halo votus barak mak naksobu atu fo votus ba partidu bo’ot sira, tanba partidu kiik sira hafahe ona numeru votos ne’e.
Kestaun seluk tan, estadu kada tinan sei lakon nafatin osan atu fó subsidiu ba parpol foun no Parpol antigu sira sira.
Nia mós konsidera kestaun sira ne’e mosu lolos Comisaun Nasional Elisoes (CNE) tenke haree, maibé CNE lolos ne’e la iha poder no sai de’it hanesan kurtina.
“CNE ne’e lolos la iha poder, hanesan boneka ida no STAE ne’e mak governu nian. Tanba partidu ne’ebé iha poder nia manipula poder atu favorese nian ne’e normal, tanba se mak xefia STAE ne’e ema hosi governu nian,”relata Carrascalão.
Hatan ba preokupasaun ne’e, Komisariu CNE José Ximenes dehan, lolos ne’e orgaun eleitoral sira hanesan CNE no STAE tenke ida de’it.
Tuir José Ximenes katak, modelu eleitoral iha Timor ne’e se ema hakarak duni orgaun Estadu ne’e la’o tuir konstituisaun artigu 65, tenke iha orgaun eleitoral independente. maibé José Ximenes dehan, komprendesaun públiku nian to Uniaun Eropea mós estranhu uitoan, kuandu orgaun eleitoral la halo eleisaun.
Tanba José Ximenes esklarese, iha modelu barak hanesan iha Guinea Bissau, eleisaun ne’e tenke orgaun eleitoral no CNE ninia papel importante atu asegura eleisaun.
“Se ita haree opiniaun ne’ebé senhor Mario Carrascalão halo, ha’u hanoin rasional, tanba komisariu (CNE) 15 ho Diretor jeral ida iha ministéiru nia okos, ita bele sente katak, agora ema la kestiona, mais aban bainrua se bebeik hanesan ne’e, se partidu balun mak la simu eleisaun, instabilidade mosu kedas,”dehan José Ximenes ba jornalista iha nia kna’ar fatin CNE foun Kolmera Dili, Tersa (28/07).
José Ximenes hatutan, nasaun foun hanesan Timor-Leste ne’e, diak liu tenke hametin de’it mak paz no dame hodi labele hamosu konflitu.
Nia dehan, CNE konkorda ho opiaun ne’ebé Mario Carrascalão hato’o, no konsidera opiniaun ne’e hanesan reflesaun ida para buka hadia mekanismu servisu CNE no STAE lolos tenke hamutuk.
“Ha’u konkorda ho opiniaun sira ne’e, i ha’u hanoin se ita hakarak rasional lolos ita nia orgaun CNE no STAE ne’e tenke ida de’it. Se fahe mós hanesan ema dehan, ida responsabel ba de’it resensiaamentu no eleisaun tenke intrega ba orgaun CNE hanesan iha Guinea-Bissau nian,” katak José Ximenes.
Nia afirma, kriteiriu kona-ba partidu politikus ida atu hari’i partidu foun tenke presija apoiantes rihun 20, tuir lolos CNE mak tenke haree kestaun ne’e.
Nia dehan, kriteriu sira hanesan ne’e analiza didiak bele hamosu tan poder ekonomia invade fali poder politikus.cos
Jornal Nacional