DILI - Fiu Elektrisidade kanek hodi hamosu sirkuit nune’e ahi haan mutuk komunidade nia uma ida iha bairu Kakaulidu Aldeia Fuslam, Suku Bairu-Pite, Munisípiu Dili.
Tuir sasin Hermenegilda Goncalves informa, akontesementu ne’e tanba fiu mak kanek nune’e hamosu ahi haan uma ne’e, sorti bo’ot ahi la de’et ba vijinu sira seluk.
“Ami toba hela maibé derepenti ami rona ema hakilar ami halai sai mai ahi haan ona ami nia vijinu nia uma ami mos tauk halai ba taka ami nia kontador, no ahi haan ne’e tanba fiu ida mak kanek,” dehan sasin ne’e ba Timor Post iha Kakaulidu, Kuarta (29/07).
Iha fatin hanesan Neko Ataide dehan, sira mos la hatene derepenti Bombeirus halai makas tama bairu refere mak foin sira halai tuir ba ahi haan mutuk ona uma ne’e.
“Ami toba hela tanba tuku 1 madrugada ona mak foin Akontese Bombeirus mai mak ami foin hakfodak,” dehan Neko.
Jornalista Timor Post atu konfirma ba iha uma nain maibé uma nain la kohi fo kometariu tanba senti tristi ho akontesementu refere, nia sasan ida de’it mos la salva.
Iha fatin seluk Komandante Operasaun Servisu Investigasaun Kriminal (SIK) Inspektor Xefi Mouzinho T. Coreira dehan, kazu ne’e seidauk tama ba sira nia parte tanba Polisia Eskuadra Komoro mak atua ba area refere, maibé SIK Nasional sei hein relatóriu hosi diatritu Dili mak foin bele ko’alia ba Midia, no hosi relatóriu mak bele hatene lolos mutivu hosi kazu ahi haan uma ne’e. (way)
Timor Post