Guiné Ekuatorial hakarak hametin relasaun sira ho Angola liuliu hosi apoiu ba ensinu lian portugés iha nasaun ne'e, hatete hosi nia embaixadór iha Luanda, iha loron-sesta ne'e, hafoin simu tiha hosi visi-prezidente angolanu, Manuel Vicente, iha audiénsia ida.
Iha enkontru ne'e nia rohan, ne'ebé analiza ona nível hosi koperasaun bilateral, embaixador Guiné Ekuatorial nian iha Angola, José Esono Micha Akeny, fó hanoin katak nasaun rua ne'e iha ona interkámbiu sira entre universidade públiku sira no hakarak aumenta akordu sira iha nível peska nian.
"Agora ami tenki hanoin hakat foun ida ba ensinu lian portugés. Ba ami hanesan lian foun ida, populasaun tenki aprende", admiti ona hosi embaixadór Guiné Ekuatorial nian.
Nasaun afrikanu ne'e sai membru dasia ba Komunidade Nasaun sira Lian Portugés (CPLP) nian iha 2014.
"Ami haree mós apoiu institusional. Atu ami bele sai tama loloos iha CPLP ami konta ho ajuda hosi nasaun irmaun sira, entre sira maka Angola, iha área oioin. Hodi simu Guiné Ekuatorial iha ritmu no hodi serbisu ho di'ak iha instituisaun sira hosi nasaun membru sira CPLP nian", nia hatete.
Resepsaun hosi visi-prezidente ba diplomata akontese iha loron ida hanesan bainhira Prezidente Guiné Ekuatorial, Teodoro Obiang, simu pose ba mandatu foun ida tinan hitu.
Partisipa iha serimónia sira iha Malabo delegasaun angolanu ne'ebé lidera hosi Ministru Relasaun Esteriór sira, Georges Chikoti, ne'ebé reprezenta Prezidente Repúblika José Eduardo dos Santos.
Iha tinan 36 ona maka iha poder - Prezidente afrikanu ne'ebé kleur liu iha poder -, Obiang hetan 93% hosi votu sira iha eleisaun prezidensiál sira iha loron 24 Abril ne'ebé, nia rasik hatete, "observadór internasional sira klasifika ona hanesan transparente, justu no legal".
SAPO TL ho Lusa