Samora Machel nia oan-mane konsidera ona iha loron-sesta ne'e rekoñesimentu boot ida ba nia aman no ba povu mosambikanu ba kondekorasaun ho títulu póstumo ne'ebé entrega iha loron 20 Maiu 2016 ba eis-Prezidente Mosambike hosi xefe Estadu timoroan.
"Hanesan importánsia boot ida ba povu mosambikanu, ba ha'u nia família no ba ha'u rasik. Hanesan rekoñesimentu boot ida tanba Samora Machel sempre luta ba libertasaun hosi povu maubere nian", hatete hosi Samora Machel Junior, iha Timor-Leste, ba Lusa.
Antigu prezidente mosambikanu nia oan-mane hanoin ona katak nia aman, "hamutuk ho organizasaun internasional sira, iha ONU, iha organizasaun ida ne'ebé ohin loron naran Uniaun Afrikanu, ko'alia beibeik atu iha rekoñesimentu katak okupasaun indonéziu hanesan ilegal, katak povu maubere merese hetan apoiu hodi sai livre".
Samora Machel Junior ko'alia hafoin simu tiha hosi Prezidente timoroan, Taur Matan Ruak, nia liman rasik, durante serimónia sira tinan 14 restaurasaun independénsia Timor-Leste nian, Grande Colar da Ordem hosi Timor-Leste, ne'ebé entrega hafoin nia aman nia mate.
"Ohin loron, povu ne'ebé nia fiar halo ona rekoñesimentu boot ida ba nia luta", nia hatete no destaka importánsia katak povu sira hosi Komunidade Nasaun sira Lian Portugés nian (CPLP) koñese nafatin istória sira hosi nasaun ida-idak tanba iha ligasaun barak ne'ebé hanesan.
Galardoadu sira seluk iha loron 20 Maiu 2016 maka visi-almirante portugés António Silva Ribeiro ne'ebé, iha tinan 1996, iha tempu ne'ebé nu'udar diretór operasional hosi Serbisu Informasaun Estratéjiku sira no Defeza Militar nian (SIEDM), ajuda ona "hodi hetan ekipamentu sira komunikasaun nian, durante okupasaun indonéziu" hodi uza iha rezisténsia timoroan nian.
"Hanesan obrigasaun ida, kestaun ida serbisu nian ba Portugal. Buat ne'ebé ami halo maka tulun polítiku esternu portugés nian, monta rede ida komunikasaun nian ne'ebé permiti ona ba señór MNE hodi kontaktu ho autoridade timoroan sira, Xanana tama iha Cipinang no primeiru Konis Santana no hafoin ne'e maka Taur Matan Ruak iha foho sira", nia afirma ona.
"Ne'e hanesan hanoin ida hosi ligasaun ba autoridade polítiku portugés sira no hosi rezisténsia nian hanesan importante tebes. Permiti ona ba rezisténsia rasik bele komunika ho di'ak ho lian, nia hanoin kona-bá konviksaun iha nia luta ba independénsia", afirma ona hosi visi-almirante ba Lusa.
Patrícia Alexandra Costa Gaspar ne'ebé kolabora ho António Silva Ribeiro iha projetu komunikasaun ho Timor-Leste simu mós kondekorasaun.
"Ami iha onra ho priviléjiu hodi serbisu iha kauza Timor nian no liuliu iha projetu ne'ebé maka hanesan luta ba autodeterminasaun. Ha'u senti orgullu no priviléjiu boot", nia hatete.
Luís Represas, autór hosi knananuk Timor, ne'ebé sai hanesan símbolu hosi solidariedade portugés iha luta timoroan nian, simu mós kondekorasaun, hakarak fahe galardaun ho povu portugés no ho autór sira knananuk nian, João Gil ho João Monge, hanesan nia esplika ba Lusa.
"Ho knananuk ne'e, bele mós knananuk seluk, maibé knananuk ne'e maka tuun ba estrada. Bainhia João Gil no João Monge hakerek ona knananuk ne'ebé laiha ema ida maka hanoin katak sei sai koñesidu", nia hatete.
Represas fó hanoin katak ema barak halo knananuk sira ne'ebé mobiliza maka'as solidariedade portugés, deklara onradu tanba sai hanesan "porta-vós no komunikador" hosi "vontade hodi halibur esforsu sira".
"Hanesan rekoñesimentu ida ne'ebé ha'u fahe ho portugés sira hotu. Ha'u la haluha katak hanesan úniku maka ha'u haree ha'u nia nasaun tomak unidu, hosi direitu no eskerda, la haree ba klase sosial sira, fiar nian, unidu maka'as ba kauza ida", nia hatete.
SAPO TL ho Lusa – Foto: Taur Matan Ruak entrega ba Samora Machel Junior, oan-mane hosi Samora Machel, Grande Colar da Ordem hosi Timor-Leste. EPA@ António Sampaio