Diretora Ezekutivu organizasaun Patria, Laura Pina, lamentavel ho desizaun governu nian ne’ebe halo nomeasaun foun ba administradores munisipius no postu administrador sira maioria mane e feto laiha.
“Ami triste tebes, tanba ami servisus maka’as fo kapasitasaun ba feto sira, maibe nai ulun sira halo desizaun politika ne’ebe la ekilivru, feto laiha,” Diretora Pina lamenta, bainhira koalia iha workshop nasional reforsa feto nia lideransa no partisipasaun iha eleisaun, iha Tower Fatuhada, Dili.
Antes ne’e, nia dehan, iha feto nain rua deit mak tuur iha kargu administradora postu administrative maibe ho nomeasaun foun ne’e troka hotu feto nain rua ne’e.
Kona ba nivel edukasaun, nia rekonese, katak feto barak mak iha kapasidade no abilidade atu ezerse kargu ne’e, tanba sira hasai lisensiatura iha area administrasaun nian.
Hatan ba kestaun ida ne’e Ministru Administrasaun Estatal, Dionisio Soares Babo, hateten laiha reprezentante feto, tanba la preense kriteria ne’ebe iha.
“Iha nomeasaun ne’e feto iha, mais depois submete ba komisaun funsaun publiku halo selesaun, nivel kuatru ba leten feto laiha entaun hau labele obriga,” Ministru Babo hateten.
Nia dehan, nomeasaun foun ne’e hala’o internal deit, tanba iha fulan neen mai sei halo fali rekrutamentu publiku ba administrador no postu administrador sira tuir meritu, e ema hotu inklui feto iha oportunidade atu kompete.
Iha parte seluk eis Administradora Postu Administrative Baucau Vila, Regina de Sousa, lamentavel ho prosesu nomeasaun administrador no postu administrador foun ne’e, tanba la bazea ba intelektualidade ema nian.
“Hau nudar Timor oan, fo hanoin deit ba ukun nain sira atu nomea ema bazeia ba ema nia intelektualidade, abilidade servisus, labele haree ba grupu,” nia sujere.
Nia kompromete aan, katak sei kompete fali bainhira governu halo rekrutamentu ba jestor foun, tanba nia formadu iha area administrasaun no iha abilidade atu servisu.
The Dili Weekly