Bispo Diocece de Baucau no Administradór Apostólico Diocese de Dili, Dom Basílio do Nascimento hateten katak, sensus ne’e hanesan lalenok ba Timor Leste (TL), atu TL bele hatene ninia ema no ninia riku soin sira ne’ebé mak ninia populasaun sira ne’e iha.
“Buat ida sensus ne’e, importannte. Tanba sensus ne’e sai hanesan lalenok ida ba ita nia nasaun atu ita hatene ita nia-an. Ita nia ema, ita nia rikusoin, hatene ita nia posibilidade,” dehan Dom Basilio ba jornalista sira iha nia knaar fatin episkopal Baucau Sesta (24/07).
Tanba ne’e, Dom Basílio afirma katak, sensus ne’e sai baze ida atu halibur dadus ka rekolla dadus atu nune’e bele halo programasaun liu-liu ba programa Governu nian nomós uma kreda nian atu nune’e ema bele hatene ninia posiblidade.
“Sensus ne’e importante atu ita haree iha tinan lima nia laran populasaun aumenta ga menus, ita nia populasaun ne’e iha ferik ho katuas sira barak liu foinsa’e ka, ema foinsa’e barak liu ferik katuas, ne’e duni sensus ne’e sai hanesan lalenok ba nasaun ida hodi haree nia-an no hatene nia-an. Tanba sensus sai baze ida atu halo programasaun halo mos dezenvolvimentu”, Dom Basílio fundamenta.
Ho sensus ne’e Dom Basílio esklarese, Estadu ou uma kreda bele hanoin no planu saida ba fatin ruma.
“Ha’u fó ezemplu hanesan iha Dili, ha’u kaer Baucau maibé ha’u haree mós iha Dili. Tanba Dili ema barak liu. Ne’eduni husi tinan lima ba tinan lima populasaun Dili nian ne’e aumenta hira, ne’e tuir númeru ema bo’ot ne’e ita tenki tau eskola hira iha ne’ebá tau merkadu, entaun merkadu ne’e iha ne’ebé koalia dehan uma kreda karik uma kreda iha ne’e iha ne’ebé atu ne’e buat sira ne’e sai sentru ida ba populasaun sira fatin ida nia”, hateten Dom Basílio.
“Ne’eduni hanesan ida ne’e mos ba nasaun nia ho dadaus hirak ne’e distritu ida ne’ebé mak ema barak liu, i distritu ne’ebé ema barak liu ne’e oinsa mak governu organiza nia-an atu kria infras-estrutura hodi bele hatán ba ema hira ne’e nia nesesidade tanba distritu hotu-hotu la bo’ot hanesan la aumenta hanesan, maibé ho buat ida sensus ne’e ita bele hatene realidade ita ema nia populasaun nia fatin iha ne’ebé atu bele organiza sasan hodi bele kria infras-estrutura, hodi fó responde,” dehan Dom Basilio.res
Jornal Nacional