DILI - Dialogu entre Prezidente Republika (PR) Taur Matan Ruak ho Veteranus ativu iha F-FDTL nee bele hamosu difrensia ideias no difrensia posizaun, maibe sei la hamosu instabelidade iha povu nia leet, tamba nee Primeiru Ministru (PM) Rui Maria de Araujo husu ba pobliku la bele paniku.
Lia hirak nee hatoo husi PM Rui, ba Jornalista sira hafoin remata enkontru ho Prezidente Republika Taur Matan Ruak, iha Palasiu Prezidensial, Aitarak Lalan, Dili, Kinta (05/05/2016).
Reuniaun neebe Prezidente Republika aban halo ho veteranus sira, Prezidente esplika oituan konaba reuniaun nee. Tamba nee hau hakarak hatoo ba publiku katak la presiza paniku, reuniaun entre Xefi estadu ho veteranus sira neebe ativu, iha forsa defeza atu esklarese kestoes balun difrensia de posizaun no difernsia opinaun balun, intermus situasaun nee diak hotu,” hateten PM Rui.
Xefi Governu nee hatutan aban veteranus sira neebe hamutuk iha ai laran halo funu durante tinan 24 ba libertasaun rai ida nee, sira tuur hamutuk hodi esklarese diferensia neebe iha, konaba prosesaun nomeiasaun Xefias buat sira nee hotu, tamba nee nudar povu no jersaun foun sira hotu tuur hakmatek rona no akompania katuas sira tuur hamutuk diskuti hodi buka solusaun ba problema sira nee.
Iha parte seuk Veteranus Manuel Rodrigues hateten tensaun politika entre veteranus sira, nee sempre mosu, laos tamba haksesuk malu atu ba ukun, maibe oinsa atu buka solusaun hodi hadia situasaun iha rai laran.
Veteranus nee mos husu ba jersaun foun sira tenki tuur hakmatek, la bele monu ba manobra politika foer hodi estraga estabilidade pais ida nee, tamba pais ida nee hamrik ho ruin no isin laos mosu mesak-mesak. Informasaun kompletu iha STL Jornal no STL Web, edisaun Sesta (6/5/2016). Joao Anibal
Suara Timor Lorosae