Ofisiál hosi GNR ne’ebé hala’o funsaun oioin iha Timor-Leste, fulan ne’e sei hasoru malu ho alunu eskola portugeza Dili, hodi hala’o debate kona-ba seguransa, no hein katak insiativa refere sei habelar mos iha eskola seluk.
"Kuda/Hametin seguransa" hanesan projetu ne’ebé adapta ba realidade lokál ba inisiativa portugeza “Eskola Segura” no ne’ebé envolve, parseria entre GNR, Embaixada Portugak iha Dili ho Escola Portuguesa Ruy Cinatti.
Hanesan tenente koronel António Ludovino esplika katak objetivu ikus no ho apoiu hosi Polísia Nasionál Timor-Leste (PNTL), maka sei habelar projetu refere ba iha eskola referensia hothotu, depois maka ba fali iha eskola seluk.
“Ami halo tuir saida maka ami halo iha Portugal no hetan duni rezultadu pozitivu. Ami hakarak halo alerta ba sira kona-ba tema refere, maibé sira maka iha responsabilidade bot ba serbisu ne’e. Ami bele hetan de’it maka ninia rezultadu hosi saida maka ami kuda iha ne’e, karik sira ko’alia ho kolega no liu-liu ba família sira”, dehan.
Hanesan ezemplu nia fó rekomendasaun kona-ba seguransa rodoviária no importante atu uza pasadeira ba la’o ain nian, ne’ebé sei bele hetan rezultadu di’ak bainhira inan-aman no família, inklui kondutór sira hatene kona-ba oinsá maka respeita pasadeira.
Inisiativa ne’e sei halo ba alunu grupu 3.º no 12.º anu, ne’ebé hakarak tuir palestra refere voluntariamente, fó hosi ofisiál GNR no abranje ba tema oioin hanesan Internet seguru, prevensaun no konsumu estupefasiente, protesaun ambentál, prevensaun rodoviária ka bullying, no seluk tan.
Habelar inisiativa ba eskola seluk, presija tan rekursu, tanba efetivu GNR iha Timor-Leste sei lakonsege halo ida ne’e, bainhira lahetan apoiu hosi PNTL.
Acácio de Brito, diretór hosi eskola portugeza, dehan katak inisiativa ne’e importante tebes, tanba bele aumenta relasaun entre sentru eskolár ho komunidade.
“Eskola tenke halo ligasaun ho komunidade lokál, liu-liu ho instituisaun sira iha Timor-Leste hodi dezenvolve sira-ninia atividade. Ami hakarak fó kontinuasaun ba ida ne’e karik GNR iha interese atu halo ida ne’e. Ami koko atu temátika ne’e bele fó prevensaun ne’ebé di’ak liu tan, fó informasaun lolos no fó apoiu ba komunidade portugés no timor-oan sira” nia hakotu.
SAPO TL ho Lusa – Foto: EPA@ António Amaral