(Kinta, 28 Abril 2016) Suku sanulu (10) husi Covalima aprezenta sira nia istória kona-ba susesu iha sira nia suku sira, hodi hatudu implementasaun projetu iha sira nia komunidade ne’ebé atinje ona liuhusi lideransa lokál no partisipasaun efetivu husi komunidade sira, iha Ba Distrito nia Expo Suku iha Salaun Administrasaun munisípiu Covalima.
Expo loron tomak ne’e loke husi Sua Exelénsia Sr. Samuel Mendonça, Sekretariu Estadu ba Administrasaun Estadu.
Ba Distrito, ne’ebé hetan apoiu jenerozu husi povu Amerikanu liuhusi Ajénsia Estadus Unidus ba Dezenvolvimentu Internasionál (USAID) no implementa husi ONG Counterpart International no nia parseiru nasionál sira, Ba Distrito servisu ho Governu Timor Leste hodi haforsa governasaun lokál, hasa’e partisipasaun komunidade, no fornese konsulta publiku no divulgasaun kona-ba prosesu desentralizasaun iha Timor-Leste.
Iha seremonia abertura ne’e, Sua Exelénsia Sr. Samuel Mendonça hateten katak, “Programa USAID Ba Distrito fasilita Selebra Susesu husi Suku sira ne’e importante tebes atu sai referensia ba Suku seluk iha Timor Laran Tomak hodi banati tuir…izemplu iha Suku Maubara Lisa (Liquiça) sira dehan katak sira livre husi dada bee moos ou susesu iha dada bee moos. Oinsa mak sira dada bee? Bele dada ba aldeia hotu hotu no hetan ona bee. Sira agora presiza mak Estrada … Portantu ne’e halo kmaan ona ba estadu ou governu lokal para bele resolve ona setor ida (bee moos) kona-ba dezenvolvimentu nian”.
Konsellu Suku 10 (suku Oegues, Maudemo, Holpilat, Fatululik, Dato-Rua, Fatumea, Beiseuc, Lalawa, Beco no Fohoren) ne’ebé konvida hodi fahe sira nia istória iha estala sira ne’e no halo aprezentasaun kona-ba sira nia projetu, fornese oportunidade ba membru konsellu husi suku seluk, ofisial Administrativu sira, reprezentante sira husi liña ministerial, no membru públiku sira, hodi aprende kona-ba oinsá membru komunidade sira servisu hamutuk hodi implementa projetu.
Susesu suku nian inklui projetu oioin hanesan hari’i grupu atu halo to’os komunál, ekipa responde ba dezastre naturais, rezolusaun konflitu, re-floresta no protesaun ambientál nian. Projetu hotu ne’e hatudu ezemplu ida ne’ebé di’ak husi lideransa lokál sira liuhusi konsultasaun ne’ebé efetivu ho sira nia komunidade hodi dezenvolve no halo mudansa iha sira nia komunidade nia laran.
Diretór Eskritóriu USAID nian ba Dezenvolvimentu Jerál, Sr. Raymund Johansen hateten, “Ba Distrito nia apoia ba governasaun lokál hala’o liuhusi koordenasaun ho Direção Nacional Apoio Administrasaun Suco husi Ministériu Administrasaun Estatál, no foka ba hasa’e fornesimentu prestasaun servisu ba komunidade sira liuhusi formasaun no fahe koñesimentu ho Konsellu Suku sira, inklui halo advokasia ba liña ministériu sira hodi apoia sira atu fornese prestasaun servisu efetivu liu iha nivel lokál. Expo Suco ohin loron nian hanesan selebrasaun ida ba susesu ne’ebé konsellu suku sira husi Covalima atinje ona, no ne’e mós hanesan oportunidade ida ba ita atu rekoñese sira nia susesu no hatudu ba suku sira seluk no mos instituisaun governu nian, katak susesu sira ne’e bele atinje bainhira iha lideransa ne’ebé efetivu no partisipasaun komunidade hodi enfrenta problema no dezafiu sira iha nivel lokal.”
Expo Suku ne’e hanesan oportunidade ida ba konsellu suku sira hodi hatudu susesu husi sira nia komunidade ba iha pesoal importante sira ne’ebé bele foti desizaun, no sai hanesan modelu ida ba suku sira seluk liuhusi hatudu ba sira oinsá abilidade ne’ebé sira hetan liuhusi formasaun ne’ebé fornese husi Ba Distrito hasa’e sira nia abilidade atu implementa projetu liuhusi konsultasaun ne’ebé di’ak liután no maneira ne’ebé inkluzivu.
Fo mos komentariu ba atividade ne’e, Xefe Suku Maudemo, Sra. Maria Fatima, hateten katak, “Expo suku ne’e diak, hodi motiva fali suku sira seluk ne’ebe karik la konsege realiza atividade balun iha sira nia suku no aprende ba malu…atu motiva ami hodi badinas liutan halao ami nia servisu nuudar xefe suku no konsellu suku iha munisipiu ida ne’e no ita atu aprezenta saida mak ita halo no implementa ona durante nee iha ita nia suku bele hatudu mos ba nain ulun sira iha momentu ida ne’e”.
Atividade ba loron ne’e maka inklui fó-sai filmajen no aprezentasaun badak kona-ba suku sira Ogues no Holpilat nia meius iha rezolusaun konflitu, no aprezentasaun susesu husi suku sira. Aleinde ba apresentasaun susesu husi suku sira ne’e, iha mos apresentasaun husi Sekretariu grupu 100% Ha’u Pronto kona-ba atividade suporta feto sira kandidata a’an iha eleisaun suku oin mai, no apresentasaun husi Ba Distrito nia parseiru asistensia legal hanesan JnJ Advocasia aprezenta sira nia atividade servisu asistensia legal no sesaun edukasaun legal foun ba komunidade.
Iha tempu hanesan, ekipa husi Ba Distrito mos halo sira nia apresentasaun kona-ba ezbosu Lei Poder Lokál no Desentralizasaun Administrativa, iha salaun Administrasaun Munisípiu.
Ida ne’e projetu Ba Distrito nia expo Suku ba dalalima ona, ho Expo Suku Oecusse nian ne’ebé hala’o iha fulan Outubru tinan kotuk, Ermera hala’o iha fulan Fevereiru, Baucau hala’o iha fulan Marsu, no Liquiça hala’o iha fulan Abríl tinan ne’e. (*)
Matadalan