Dili, Radio Liberdade Online - Governu ho Igreja establese komisaun ba implementa konkordata ne’ebe Santa Se ho Governu asina, informa Ministru Negosiu Estranjeiru, Hernani Coelho ba Jornalista sira wainhira remata Konferensia Episkopal iha Palacio do Governu 21/4/16, hamutuk ho Bispo nain 3 e membru Gobernu relevante.
“Kolia konaba implementasaun konkordata ne’ebe mak ita asina ho Santa Se, ne’ebe iha fulan marco, permeiru Ministru ba rasik iha rai Vaticano hodi entrega dokumentus ne’ebe mak Parlamentu Nasional ratifika tia ona,ne’e duni inkontro ida ne’e, ohin ami bolu mai atu tur hamutuk ho Konferensia Episkopal atu nune para ita bele hare konaba nia partikalidade implementasaun konkordata ne’ebe mak iha, ne’e duni iha biban ida ohin ne’e, ami hare fila fali postus sira ne’ebe mak inportante iha konkordata ne’e e hare konaba aktus saida mak direitamente presija ita atu halo iha tempu badak no hare konaba ninia futuru no sustentebilidade implementasaun konkordata ne’e rasik, tamba ne’e mak Amu nain tolu ohin tur hamutuk ho Governu nomos komisaun entre Ministerial Governu ninian hodi halo abordajen asuntu sira ne’e,” esplika Hernani.
Ministeriu Negosiu Estrajeiru afirma liu tan katak iha asuntu barak mak komisaun sei implementa iha tempu badak, “ iha ne’e, ita iha kedas konkordata ne’e, iha ninia artigus barak mak preve asoens sira ne’ebe mak relasiona ho responsabilidade Governu ninian wainhira asumi akordo ne’ebe mak iha entre Timor-Leste ho Santa Se, iha artigu sira ne’e, preve katak iha ninia inplementasaun ita presija iha, ita bolu katak kontratu kuadru ba iha aktividade sira ne’ebe mak preve tia ona iha konkordata nia laran, iha ne’eba ita iha aktividades sira ne’ebe mak relasiona nia natureza edukativu, sosial, no mos administrasaun, ne’e duni ohin ami tur hamutuk atu hodi hare, halo nusa mak ita atu implementa area tolu ne’e tuir buat ne’ebe mak instituisaun rua ne’e konkorda tia ona.”
Iha fatin hanesan direjente konferensia Episkopal Dom Basilio do Nasimento hateten durante ne’e Governu ho Igreja implementa ona konkordata kona ba Edukasaun no Finansiamentu.
Dom Basilio haktuir “Ida mak edukasaun, liu-liu edukasaun, ida seluk mak finansiamentu, to’o oras ne’e subsidiu Governu fo, husi ne’e ba oin kontribuisaun estadu, agora ida ne’e mos valor mak ida ne’ebe e valor ida ne’e taka saida iha area hirak ne’ebe mak tuir konkordata abaranze kontribuisaun finanseiru e depois oinsa mak definisaun husi estadu nian atu buat hirak ne’e lao no implementasaun.”
Rádio Liberdade Dili