Problema veteranus nian, ohin loron, komplikadu boot. Aat liu tan, balun ne’ebe uluk sai tiha reaksionista hodi kolabora ho Indonesia buka tuir asuwain FALINTIL sira mos agora rejistu hotu nudar veteranus.
Problema seluk maka veteranus ne’ebe veteranus duni, mas to’o agora seidauk hetan rekonhesimentu no sira nia naran la tama iha data base. Nune’e, prezodika sira atu simu sira nia direitu nudar veteranus.
Liu husi dialogu komunitaria iha Suku Maina I, Kuarta (22/7/2015) no iha Suku Pairara Kinta (23/7/2015), Posto Administrastivu Lospalos, Munisipiu Lautem, veteranus sira iha suku rua ne’e lamentavel tebes, tanba sira nia direitu abandonadu no sira senti hanesan injustisa boot ida ba sira, tanba ema balun ne’ebe reasionista simu fali direitu veteranus no hirak ner’ebe veteranus la haten buat ida to’o ohin loron.
Jornalista JNDiario, Napoleão Xavier, ne’ebe akompanha vizita PR Taur Matan Ruak nian, husi Munisipiu Lautem, informa katak, PR Taur ho korazen responde ba preokupasaun veteranus sira nian ne’e hodi dehan, wainhira nia ho Komandante Em Xefi das FALINTIL, Kay Rala Xanana Gusmão, sei moris maka sei rezolve hotu problema veteranus nian.
“Hau dehan, enkuantu maun Xanana ho hau sei moris, ami nain rua bele halo buat hotu para ajuda imi alin sira rezolve, ami lakohi soe hela problema veteranus ne’e ba jerasaun foun sir. Defisil tebes, kuandu ita koalia kona-ba osan,” hateten PR Taur Matan Ruak.
PR Taur hatutan, martires ne’ebe mak la iha familia ne’e problema ida. Tanba ne’e PR Taur husu ba Veteranus sira atu kualia nafatin, tanba ne’e responsabildade ema hotu nian.
PR Taur mensiona katak, problema veteranus nian, la bele husik hela todan ba jerasaun foun sira atu fera ulun no buka rezolve, maibe veteranus sira duni maka tenke hamutuk hodi buka solusaun. Mesmu, Governu ho Estadu mos iha obrigasaun atu apoiu buka dalan ba situasaun ida ne’e.
PR Taur dehan, veteranus iha Timor laran no komunidade sira mos prekupa, tanba problema Veteranus Antigu Kombatetens ne’e la gampang.
“Ita iha Veteranu ne’e iha problema rua, ida Veteranu ne’e sai faktor ida fahe ita entre sira ne’ebe mak simu osan no sira ne’ebe mak la simu osan,”afirma PR Taur.
Segundu parte, Taur esplika, se’e 57.000 Veteranus Antigu Kombatetens, Martires simu ona Rp. 150 triliun. Agora ba sira ne’ebe mak seidauk simu osan iha osan ka lae atu selu ba sira. **
Jornal Nacional