Prezidenti Repúblika (PR), Taur Matan Ruak hateten katak, nia desidi hili Capitão de Mar e da Guerra, Pedro Klamar Fuik, hodi troka Xefi Estadu Maior das Forsas Armadas, F-FDTL, Maijor Jeneral Lere Anan Timur, tanba bazeia ba proposta Governu nian.
Proposta Governu ba kargu Xefias F-FDTL ne’e iha rua, proposta ida Governu mantein kompozisaun anterior hanesan Lere Anan Timur kontinua ba Xefi Estadu Maior das Forsa Armada F-FDTL, no Filomeno Paixão hanesan Vise Xefi Estadu Maior.
Proposta segundu, Governu aprezenta fali Pedro Klamar Fuik hanesan Xefi Estadu Maior, Coronel Calisto dos Santos ‘Coliati’ hanesan Vise Xefi Estadu Maior no Komandante Naval, Eugenio das Neves hanesan Koronel.
Nune’e tuir kompeténsia konstitusionál Prezidenti hili proposta ida husi proposta rua ne’ebé mak Governu aprezenta. No desizaun Prezidenti nian monu ba iha proposta segundu.
Maibé Prezidenti Repúblika Taur Matan Ruak dehan, hanesan Xefi Estadu, atu iha diferensa oinsa mós, sei la sobu estabilidade nasionál.
Maibé depois Prezidenti anúnsia tiha desizaun ne’e, hetan reasaun deskontente husi Lere Anan Timur no mós veteran sira ativu iha F-FDTL.
Maski mosu deskontentamentu husi Lere Anan Timur ho nia maluk sira, maibé Xefi Estadu Taur Matan Ruak, hateten katak, maski iha diferensias hanoin maibé sei la afeta ba estabilidade nasionál.
“Foin dadauk Governu haruka fali proposta mai ha’u dehan, ok sé Prezidenti lakohi Lere, entaun veteranu sira iha F-FDTL nia laran ne’e tenke sai hotu. Ha’u dehan di’ak, entaun ha’u hili fali ita nia foinsa’e ida,” dehan Taur Matan Ruak liu husi diálogu Komunitáriu ho komunidade iha Suku Bukoli, Postu Administrativu Baucau, Munisípiu Baucau, Segunda (19/04).
Xefi Estadu ne’e esklarese, agora nia hili ona joven na’in rua ho tinan 40, hanesan kapitaun Angkatan laut, Klamar Fuik ho Coliati.
“Hanesan Prezidenti Repúblika, garante ba imi katak, sei la fahe ita, fahe ita ne’e kecil, halibur ita mak bo’ot liu,” katak Taur Matan Ruak.
Nia esplika, foin dadauk ezonerasaun ne’e, iha diferensa duni, tanba Prezidenti Repúblika hakarak Jeneral Filomeno Paixão, maibé Governu hakarak Lere nafatin.
Xefi Estadu ne’e hatutan, ida ne’e sai polémika bo’ot, to’o Taur Matan Ruak tenke ba to’o Parlamentu Nasionál (PN).
Taur Matan Ruak afirma, nia defende tranzisaun, tanba tuir régras militar nian, tinan to’o tenke reforma.
“Sira balun dehan, Jeneral Lere lakohi, Jeneral Lere tenke kumpri lei, iha ailaran mós lei iha, nusa mak nasaun ukun-an tiha, lei laiha,” katak Taur Matan Ruak, hodi responde ba preokupasaun komunidade nian kona-ba ezonerasaun ne’ebé Xefi Estadu ne’e halo ba Jeneral Lere Anan Timur.
Komunidade Carlos Baptista hateten katak, tanba saida mak Governu ho Prezidenti la rona malu kona-ba kargu Xefias iha F-FDTL nia laran.
“Rai ne’e presiza paz no estabilidade, maibé situasaun jeral iha ita nia rai, ne’ebé tuir loloos ami labele sente ona, maibé buat ne’e mosu nafatin. Problema ezonerasaun ne’e, tanba saida mak sai hanesan ne’e,” katak Carlos Baptista.cos
Jornal Nacional