DILI - Advogadu Paulo Remedios hatete sei lori Direitór Ezekutivu Asia Justice and Right’s (AJAR), José Luis Oliveira ba tribunál, tanba sente ofendidu no prejudikadu tebes ho nia deklarasaun iha imprensa sira.
“Ha’u nunka bosok públiku, ha’u iha evidensia mak ko’alia hanesan ne’e. Ha’u iha karta kompletu mai hosi Prezidente Repúblika, Kuartel Jéral F-FDTL no seluk tan. Karta sira ne’e ha’u haruka ona ba Ministériu Públiku hodi bele ajuda halo dialogu kazu Mauk Moruk nian,” Paulo Remedios hatan ba Timor Post iha Café Brasil, Kinta, (23/7).
Nia hatutan, iha loron 15 Jullu foin lalais nia hetan karta autorizasaun ida mai hosi Palásiu Prezidensial hodi bele buka solusaun ba kazu MM.
“Ha’u sei lori José Luis Oliveira ba tribunál hodi hatan kona-ba nia deklarasaun katak ha’u bosok, ha’u halo mafia,” Remedios afirma.
Entretantu, karta ne’ebé diariu ne’e asesu ho konteudu no númeru referênsia 201/XV-VII/2015 ho assuntu resposta a V. Petição de 08 de Julho 2015.
Apresento os meus melhores cumprimentos. Em resposta á V. informação de 08 Julho de 2015, por incumbenção de sua Excelência, o ex- Presidente da República, Dr. José Ramos-Horta, foi mandatado pelo Governo e por sua Excelência, o Presidente da República, para procurar uma solução pacífica para as reivindicações apresentadas pelo Sr. Paulino Gama (aliás, Mauk Moruk). O Dr. Ramos-Horta está mandatado para falar directamente com todos os envolvidos para procurar o melhor desfecho para a segurança, estabilidade e desenvolvimento nacional.
Mais estou incumbido de esclarecer que a Presidência da República não poder dispor do património do Estado da forma solicitada. Karta ne’e asina hosi Xefi Casa Sivil Interno, Aniceto Berteni Guro Neves.
Hatan kona-ba intensaun advogadu Paulo Remedios, Diretór AJAR hatete, saida mak nia chat ho jornalista Timor Post via mídia sosial facebook nu’udar konversa pessoal no José Luis Oliveira dehan konversa ne’e off the record ne’ebé bandu atu públika sai ba públiku.
“Ha’u hatete ba kolega ne’e dehan off the record. Konversa ne’e nu’udar kolega, maibé kuandu Paúlo Remedios hakarak lori duni ha’u ba tribunál, entaun ha’u mós sei lori fali ita bo’ot sira, tanba saida mak ha’u ko’alia ne’e off the record,” José Luis Oliveira via telemovel ba Timor Post, Kinta, (23/7). (oki)
Timor Post