DILI - Primeiru Ministru, dr. Rui Maria de Araújo, husu ba timoroan tomak atu banati tuir Don Alberto Ricardo da Silva (matebian eis Bispu Dioseze Dili) nia hahalok ne’ebé maka nia halo durante moris iha mundu ida ne’e.
“Ha’u nia hanoin ho selebrasaun ohin ida ne’e ita mai agradese no aumezmu tempu hanoin fila fali buat di’ak hotu ne’ebé amu bispu husik hela mai ita no hanesan timoroan ita bele banati tuir iha ita nia moris lor-loron nafatin,” PM Rui dehan ba jornalista sira iha Igreja Katedrál Vila-Verde, Díli, Sábadu (09/04), hafoin partisipa misa selebrasaun dezlutu Don Alberto Ricardo.
Nia hatutan misa hamutuk ho família, Dioseze Dili no Igreja Timor-Leste hato’o agradesimentu tinan ida tiha ona Don Alberto Ricardo husik hela povu Timor.
Nia haktuir Don Alberto mate husik hela ezemplu nu’udar ema ne’ebé dedika ba ninia misaun ema fiel nu’udar sarani no mós pastór apóstulu nia saseluk ida iha Nasaun Timor-Leste no konsege hala’o serbisu barak iha dioseze ba populasaun liu-hosi estrutura igreja nian.
Iha sikun seluk, Domingos Neves da Silva nu’udar família matebian Don Alberto, hatete nia sente triste maibé família prontu atu haree buat ne’ebé sei mosu mai.
“Ohin tinan ida ona ha’u sente triste maibé família prontu atu haree buat ne’ebé mai fali iha oin. Ne’ebe, ita família hotu hamutuk hanoin iha prezente ita haree amu bispu foun mós ohin halo misa ba nia ne’e hanesan sentidu ida amu bispu ida mate bispu foun seluk kaer okaziaun nafatin,” Domingos informa.
Apoiu governu nian ba família sira durante ne’e, nia hatán, família laiha lia seluk maibé fó obrigadu tanba governu komesa kedas Don Alberto nia moras ajuda matebian ba iha Ospitál.
Iha nia omília ba selebrasaun dezlutu Don Alberto, Bispu Dioseze Dili, Don Virgílio do Carmo da Silva hato’o agradese no obrigadu barak ba sarani hotu ne’ebé maka mai ona iha ne’e hamutuk ho Dioseze Dili fó hanoin fila fali ita nia bibi atan di’ak ne’ebé husik hela ita iha tinan kotuk.
“Loron ida ne’e loron atu harohan nian, loron atu agradese ba buat hotu ne’ebé maka iha. Onestamente de’it imi ita hotu ne’ebé iha ne’e, ita hakmatek bainhira ita kolia kona-ba buat ne’ebé moris ninian, bainhira ko’alia kona- ba ita nia mate, ita nia terus, pior liu ko’alia kona-ba ita nia mate ne’e ita lakohi atu rona,” Don Virgílio dehan iha nia omília.
Amo Virgílio haktuir katak hanesan ema balun dehan la’ós mate maka ema tenki tauk maibé nunka bele tauk atu hahú moris ida ne’e. Loos duni. Sé hakarak atu mate, di’ak no buka atu moris di’ak. Uluk ida ne’e maka ha’u hanoin ita bele haree ezemplu ida hosi ezemplu barak ita bele ohin iha figura ita nia Don Alberto Ricardo hosi nia moris, nia terus no nia mate rasik bainhira husik hela Dioseze Dili iha tinan kotuk.
“Ohin ita halibur hamutuk iha ne’e atu komemora aniversáriu no dezlutu ba amu Ricardo nia mate. Loos duni, bainhira ko’alia kona-ba mate ita hanoin tuir ba buat ne’ebé terus nian, buat ne’ebé ukun ninian no sentimentu sira seluk maibé ida ne’ebé realidade ita ema ninian. Mai ita sarani leitura sira ohin ninian konvida ita atu haree ba mate la’ós hanesan ema jintiu ida. Judas Makabeu orienta nia soldadu sira atu hasa’e sakrifísiu ba Maroamak tanba nia fiar, fiar ba mate ne’ebé moris hias ida ne’e maka na’in nia esperansa. Ida ne’e maka ita hotu nia fiar,” nia dehan.
Iha fatin hanesan, Vigáriu Jerál Episkopál Dioseze Dili, Pe. Juvito do Rego, reprezenta família matebian Don Alberto Ricardo da Silva, hakarak agradese ba akompañamentu ba eukarístia sira hotu ne’ebé selebra durante tinan ida ne’e nia laran ba amu bispu matebian.
“Hodi família nia naran hakarak agradese mós ba komunidade relijiozas hotu no ema hotu ne’ebé durante tinan ida ne’e nia laran husu misa ka intensaun ba amu bispu matebian nian, ba na’in ulun sira hotu nasaun ida ne’e ninian, eis primeiru ministru, reprezentante governu ninian, ba mós VI Governu Konstitusionál ne’ebé fó apoiu tomak hahú hosi tinan kotuk mai to’o iha momentu ida ne’e, lori família nia naran ami agradese,” Amu Juvito hatete.
Tuir observasaun Timor Post nian iha terrenu katak misa dezlutu ba amu bispu matebian komesa tuku sia (9) dader to’o remata. Misa ne’e prizidi hosi Bispu Dioseze Dili, Don Virgílio do Carmo da Silva, Bispu Dioseze Baucau, Don Basílio do Nascimento, Bispu Dioseze Maliana, Don Norberto Amaral, padre no madre sira, Primeiru Ministru, Rui Maria de Araújo, membru governu, família matebian amu bispu nian no sarani sira. Hafoin misa sai, dezloka kedas ba Maloa (Ailok-Laran) hodi kari aifunan ba Don Alberto nia rate.
Semitériu Maloa
Oras ne’e dau-dauk, Igreja Katólika Dioseze Dili konstroi ona semitériu ida iha Maloa Ailok-Laran, Postu Administrativu Dom Aleixo, sai hanesan semitériu privadu hodi prepara ba amu lulik sira.
Tuir Vigáriu Jerál Episkopál Dioseze Dili, Pe. Juvito do Rego, hatete halo semitériu iha ne’ebá dioseze maka hanoin hodi halo atu loron seluk bele lori mate isin sira ba tau iha ne’ebá molok halo orasaun.
“Ita hatene tanba semitériu ne’e dedikadu duni ba amu lulik sira hotu-hotu ne’ebé kuandu mai oin sei la ba hakoi tan iha rate komun maibé rate ida ne’ebá ne’e hanesan semitériu privadu ida ba nai lulik hot-hotu ne’ebé serbisu iha dioseze ne’e nia laran,” Pe. Juvito ba jornalista sira hafoin misa selebrasaun dezlutu Dom Alberto Ricardo iha Igreja Katedrál Vila-Verde, Sábadu foin lalais.
Nia hatutan semitériu refere hanesan uniaun ida, katak amu lulik Dioseze Dili laran sira maka túr hamutuk husu dioseze rai pedasuk ida hodi konstroi uma tomak ida iha ne’ebá ho hanoin katak halo semitériu ba amu lulik sira.
Enkuantu, família matebian Dom Albertu Ricardo da Silva nia alin, Domingos Neves da Silva informa katak fatin ne’ebé maka oras ne’e dau-dauk Don Alberto Ricardo hakoi ba ne’e hanesan provizóriu de’it.
“Konforme família rona hosi igreja katak rate ne’e hanesan provizóriu de’it tanba iha momentu ne’ebá bispu nia fatin maka Katedrál maibé komu momentu ne’e loron boot entaun fatin laiha,” nia dehan.
Nia hatutan to’o tinan lima tenke hasai Don Ricardo nia ruin hodi ba tau iha Katedrál. Ne’e maka tuir amu bispu nia ko’alia hanesan ne’e.(Meu/Lj6)
Timor Post