Prezidente Repúblika (PR), Taur Matan Ruak hatete katak, Timor Leste halimar liu ho prosesu definisaun fronteira marítima entre Timor Leste ho Australia.
Xefe Estadu ne’e haktuir, oras ne’e dada’uk iha ona prosesu atu rezolve fronteira marítima entre Australia ho Timor Leste.
“Kazu ida ne’e, hanesan fali Timor Leste halimar oitoan, orsida ita dehan, ita hakarak osan mak uluk, depois ita hakarak dehan fali rai mak uluk tan, ne’ebé ha’u foin mak mai polítika, maibé ha’u haree ita nia polítika ne’e kapás,” relata Taur Matan Ruak iha Suku Lourba, Postu Administrativu Bobonaro, Munisipiu Bobonaro, Sesta (03/04), hafoin hakotu nia programa vizita Suku iha Munisipiu refere durante semana ida.
Maibé Taur Matan Ruak relata, ema balu dehan, kazu ida ne’e fasil atu rezolve ne’e, bosok.
“Se mak kria espetativa ida ne’e, nia higenio, maibé hatete dehan imposivel, ida ne’e mós bosok, agora hatete dehan la fasil, ida ne’e signifika katak, Timor Leste rekuñese katak, Australia ninia hanoin lahanesan ita,” katak Taur Matan Ruak.
Tanba ne’e, Taur Matan Ruak dehan, Timor-oan sira tenke perparadu, atu ho matenek bo’ot, sabidoria, bele buka solusaun ba problema ne’ebé normal entre nasaun viziñu.
“Ita nia Estadu hili ita nia maun bo’ot Xanana para nia lidera ida ne’e, ha’u dejeza ba nia, em nome de nasaun susesu, i ha’u fiar katak, nia iha kapasidade para lidera,” relata Taur Matan Ruak.
Xefe Estadu ne’e mós dehan, nasaun Timor Leste tomak apoia inisiativa ida ne’e, tanba ida ne’e direitu povu Timor Leste nian.
“Ha’u triste oit oan, ha’u rona kuandu Timor-oan balu tau em duvidas kona-ba Prezidente Repúblika ninia vontade atu defende soberania,” afirma Taur Matan Ruak.
Nia haktuir, povu ki’ik sira mós sei luta maka’as hodi defende sira nia soberania, satan Prezidente Repúblika ne’ebé hanesan simbolu nasaun nian.
“Ha’u horibainhira hatete katak, iha Timor Leste ne’e, Timor-oan oit oan de’it, bele sura ho liman mak halo liu ha’u ba Timor Leste, sira barak ne’e ko’alia ibun mak bo’ot,” katak nia.
Tanba ne’e, Taur Matan Ruak dehan, ba kazu ida ne’e, konta ho Prezidente Repúblika i hanesan mós Komandante Supremo das Forsas Armadas.cos
Jornal Nacional