Prezidenti Repúblika (PR) Taur Matan Ruak informa katak, maske povu Timor Leste (TL) halo demonstrasaun dalabarak ona kontra Australia hodi defende sira nia soberania, maibé to’o agora Australia seida’uk fó ulun atu rezolve lalais fronteira marítima ho Timor Leste (TL).
“Ho Australia ita iha problema, tanba to’o agora, Primeiru Ministru Australia hateten katak, Australia seidauk prontu diskuti fronteira marítima,” informa Xefi Estadu Taur Matan Ruak, bainhira diálogu ho komunidade Suku Vato Boro, Postu Administrativu Maubara, Munisípiu Liquiça, Tersa (29/03).
Taur Matan Ruak esklarese, Estadu TL halo esforsu para regulariza disputa fronteira rai ho tasi entre TL ho Indonesia i Australia.
Xefi Estadu ne’e dehan, problema fronteira problema ne’ebe la fasil atu rezolve lalais iha mundu, hanesan Indonesia ho Malaysia no Papua Nova Guine.
Maibé Taur Matan Ruak dehan, fronteira rai maran entre TL ho Indonesia agora dada’uk hela pursentu rua de’it, tanba esforsu ida ne’e hahú kedas husi primeiru Governu.
“Foin dada’uk Prezidenti Repúblika Indonesia, Joko Widodo mai vizita ita nia rai, iha enkontru ita levanta kestaun ida ne’e. Saida mak ami nia intesaun, halo esforsu para hakotu tiha pursentu rua ne’e, hodi avansa fali ba fronteira marítima,” katak Taur Matan Ruak.
Taur Matan Ruak afirma, Australia seida’uk fó ulun atu rezolve fronteira marítima entre sira ho TL, tanba antes TL ukun-an, Australia iha tiha ona akordu ho Indonesia kona-ba TL nia mina iha tasi laran.
“To’o ita ukun-an ita halo fali akordu ida, ita asina ho Australia akordu ida atu halo esplorasaun ba mina no gas,” katak Taur Matan Ruak.
Maibé Taur Matan Ruak esplika, iha akordu ne’e hateten katak, atu deskuti fronteira ne’e, to’o tinan 50 mak foin bele diskuti.
Taur Matan Ruak dehan, foin dada’uk TL lori Australia ba Tribunal internasional kona-ba asuntu ida ne’e, maibé Australia hatete nafatin katak, sira seidauk prontu deskuti fronteira ida ne’e.
“Kestaun mak ida ne’e, bainhira mak Australia prontu atu diskuti asuntu ida ne’e,” Taur Matan Ruak dehan.
Xefi Estadu ne’e esklarese lia hirak ne’e atu responde kona-ba preokupasaun komunidade Suku refere nian kona-ba soberania TL nian ne’ebé to’o agora Australia la fó ulun atu rezolve.
Komunidade Prizanto Oliveira, husu ba PR, Taur Matan Ruak atu esplika kona-ba fronteira tasi entre TL ho Australia ne’ebé to’o agora sei iha problema.
“Tanbasa mak ita nia soberania ne’e, Australia hakarak mai hada’u fali,” lamenta Prizanto Oliveira.cos
Jornal Nacional