DILI - Tribunal Distrital Dili aplika pena prizaun fulan rua no suspende tinan ida ba arguidu Zuvinal de Jesus Soares, tanba provadu praktika krime violensia domestika hasoru nia kaben lezada Martina Mardou.
Liu husi audensia julgamentu tribunal lee sai leitura sentensa katak, ministeriu publiku akuza arguidu Zuvinal de Jesus praktika krime violensia domestika hasoru nia kaben lezada Martina Mardou. Iha julgamentu arguidu la konfesa faktus, maibe lezada deklara arguidu baku no tuku nia dala barak.
Tanba nee tribunal konsidera faktus iha akuzasaun provadu hotu. Arguidu akresenta katak momentu nee nia ho kondisaun lanu. Maske ho kondisaun lanu laos dehan laiha ona hanoin bainhira atu halo buat ida. Ho ida nee tribunal aplika pena prizaun fulan rua no suspende ba tinan ida. No arguidu mos selu kustu judisiariu $10 ba tribunal.
Tuir akuzasaun husi ministeriu publiku katak iha loron (5/08/2015) tuku 16:00 loraik iha Liquisa arguidu hemu tua sabu no tua mutin botil rua too lanu. Ho kondisaun ida nee arguidu basa iha lezada nia hasan parte los no karuk dala barak no tuku dala ida iha hirus matan. Husi arguidu nia hahalok nee halo lezada senti moras iha nia isin lolon. Ho Ida nee ministeriu publiku akuza arguidu ho krime violensia domestika neebe previstu iha artigu 145 kodigu penal TL.
Audensia nee prezide husi juiz singular Ivan Antoninho, reprezenta ministeriu publiku prokurador Ozorio de Deus no arguidu hetan assistensia legal husi defensor publiku Estaque Guteres. Informasaun kompletu iha STL Jornal no STL Web, edisaun Kinta (31/3/2016). Domingas Gomes
Suara Timor Lorosae