Roportagen: João Mau Leto
MALIANA: Xefi Suco Tapo/Memo, Posto Administrativu Maliana, Munisipiu Bobonaro, Gaspar de Jesus da Conceição Husu Ba Governo Presiza Kontinua tau atensaun ba Irigasaun Maliana II. Irigasaun ne’e potensia tebes atu fornese bee ba area natar produktivu 3.400 hektares (ha).
Kestaun refere, Gaspar de Jesus da Conceição hato’o direita ona ba Presidente da República Taur Matan Ruak bainhira vizita Suco Tapo/Memo semana hirak liubá. Irigasaun Maliana II konstrui iha tinan 1982, tempoIndonesia. Bee hatama hosi mota Malibaka. Tama ba faze ukun aan, iha tinan 2012. Kompania Hugo Amor rehabilita fali hodi fornese bee ba natar maibé seidauk too tinan 2, kondisaun irigasaun ne’e aat fali. Hori uluk kedas, komunidade Tapo/Memo maioria depende ba produsaun natar no toos. Uza bee husi irigasaun Maliana II. Kuandu irigasaun ne’e aat, ou la funsiona, maka sira nia natar 3.400 hektares bele abandona. Komunidade suco refere tenki leba terus.
Uluk, tempo okupasaun Indonesia nian, komunidade Suco Tapo/Memo koiñesidu nudar suku armagen Hare nian (Desa Lumbung Padi). Ne’e duni, kuandu kondisaun irigasaun Maliana II aat, maka sira nia produsaun hare mos tun kedas. Desde ukun aan, tamba kondisaun irigasaun aat, sira nia produsaun hare kada tinan tuun makaas los. Produsaun hare la hanesan ho tempo Indonesia nian.
Iha sorin seluk, Xefi Grupo Patrata Tapo/Memo, Veronica Casimira kontinua kestiona sobre programa Governo, Povu Kuda Governo Sosa. Iha fatin hotu-hotu, tau kuadru avizu: “Povu Kuda Governo Sosa”. Ne’e bosok deit komunidade. Kada tinan komunidade Tapo/Memo produs hare no aihan bar-barak hosi toos maibé Governo nunka tun ba sira nia suco, sosa sira nia produtu, “afinal Governo bosok deit ami,” nia reforsa.
Iha parte seluk, responde preokupasaun refere, Administrador Munisipiu Bobonaro, Zeferino Soares dos Santos hatete, tekniku sira hala’o ona estudu segundu fase ba Irigasaun Maliana II. Iha tinan hira ba oin, Governo sei implementa projetu ba irigasaun Maliana II. Importante mak komunidade Tapo/Memo tenke garante kompañia ne’ebé atu hala’o projetu refere to’o remata. Alende ne’e, Departementu Agrikultura Munisipiu Bobonaro iha ona programa feitu ona, atu halo konstruksaun ba Irigasaun Maliana II iha tinan hira ba oin. “Tekniku sira hala’o hela estuda ba segundu fase atu hala’o konstruksaun ba Irigasaun Maliana II. Ita bo’ot sira labele duvidas tan. Tinan hira ba oin, Ministeriu Agrikultura, Diresaun Irigasaun sei hala’o konstruksaun,”promesa Administrador Munisipiu Bobonaro Zeferino Soares dos Santos.
Jornál Suara Timor Lorosae, Loron Tersa, 29 Marsu 2016 - Foto: Gaspar de Jesus da Conceição