Komunidade Munisípiu Liquiça husu ba Prezidenti Repúblika (PR), Taur Matan Ruak atu muda sistema Governasaun husi semi Prezidensial ba Prezidensial. Tanba semi Prezidensial ne’e, Prezidenti Repúblika laiha funsaun ka poder. Maske Prezidenti Repúblika ne’e hili diretamente husi povu.
Maibé Prezidenti Repúblika Taur Matan Ruak responde katak, muda sistema ne’e la fasil. Tanba sistema Governasaun ne’e defini iha Konstituisaun Repúblika Demokrátika Timor Leste (RDTL).
“Ita nia konstituisaun mak defini sistema iha ita nia rai, tanba ne’e, kuandu laiha Partidu ida atu manan, sistema ne’e sei la’o nafatin hanesan ne’e,” esplika Taur Matan Ruak, ba komunidade sira iha diálogu Komunitária iha suku Vaviquina, Postu Administrativu Maubara, Munisípiu Liquica, Tersa (29/03).
Albito dos Santos ne’ebé mak reprezenta komunidade ne’e koalia maka’as katak, lalós wainhira Prezidenti Repúblika ba rona tiha povu nia problema iha terrnu, maibé fila fali ba la halo buat ida.
“Durante ne’e, Prezidenti hateten katak, imi nia preokupasaun ne’e ha’u sei hato’o ba Governu, ida ne’e lalos. Tanba ita bo’ot mak Prezidenti tiha, ita bo’ot ba haraik-an fali ba Governu. Ita bo’ot Prezidenti, aman nasaun nian, tenke muda sistema ne’e ba Prezidensiál, tanba Prezidenti ne’e povu mak hili, labele ba haraik-an fali ba Governu,” Albino dos Santos afirma.
Albino mós argumenta katak, durante ne’e PR mak la’o ona ba suku hotu-hotu, iha TL laran tomak, no identifika problema barak husi povu, maibé Prezidenti labele halo buat ida.
Maibé PR Taur Matan Ruak esplika katak, Governu halo buat ida tuir konstituisaun haruka, Governu labele halo buat ida kontra fali konstituisaun rasik.
“Governu halo buat ne’ebé nia bele halo, maibé la halo buat ne’ebé ita hakarak,” Taur Matan Ruak fundamenta.
Xefi Estadu ne’e afirma katak, Prezidenti Parlamentu Nasionál (PN) de’it mós ema atu hasai nia husi Parlamentu Nasionál (PN), tanba ema hanoin katak, nia (Vicente) halo buat seluk.
“Imi halo tan hanesan ne’e, hanoin didi’ak, se la’e ema bele hasai tan ha’u husi Prezidenti imi mak hatene,” dehan Taur Matan Ruak.cos
Jornal Nacional