Parlamentu Nasional (PN) husu Polisia Nasional Timor-Leste (PNTL) atu mantein profesionalismu no imparsialidade wainhira halo seguransa iha publiku.
Liafuan ne’e hato’o husi Vise Prezidenti PN, Aderito da Costa Hugo, bainhira reprezenta Prezidente PN hodi partisipa seremonia aniversario PNTL ba dala XVI, Segunda (28/3/2016).
“Ita hein katak ho idade 16, hanesan institusaun Estado nian ida sira kontinua dezenvolve hodi tau atensaun liu ba profesionalismu, imparsialidade iha link serbisu ninian, profesionalidade no imparsialidade PNTL nian ne’e tenke rezulta iha atendimentu publika, realidade progresu dezenvolvimentu ne’ebe mak avansa maka’as iha PNTL iha mos desintendimentu balun mai husi povu, hanesan reprezentante povu nian ami mos sei simu hela keixas, lamentasoens husi publiku sobre atendimentu publiku ne’ebe halo husi membru PNTL,” hateten Aderito Hugo.
Deputado bankada CNRT ne’e hatutan, PNTL nia serbisu mak mantein Lei ho Ordem, tanba realidade akontese katak, rekor ne’ebe rejista iha nasional no mos internasional, liu husi eventu internasional lubuk ida ne’ebe mak Timor sai hanesan uma nain la’o diak tebes, ne’e mos tanba seguransa husi PNTL nian.
“Ita nia eventu internasional hirak ne’ebe mak liu ba ho susesu hanesan iha eleisaun jeral ne’ebe mak la’o ho kontroladu, ne’e hatudu katak PNTL serbisu diak no kontinua kontribui ba estabilidade politiku no seguransa nasaun ninian. Instituisaun PNTL no F-FDTL hetan atensaun maka’as iha Estado ninian, depois krizi tinan 2008 ne’ebe mak ho reforma setorais li-liu reforma iha defeza seguransa ninian,” dehan Aderito Hugo.
Reprezentante povu iha uma fukun PN ne’e apresia no orgulho tebes ho mensagem Komandante Jeral PNTL, Komisario Julio Hornay nian, ne’ebe husu ba membru PNTL atu tau atensaun maka’as ba atendimentu publiku nian.
“Hau apresia tebes ho deklarasaun komjer Julio Hornay nian ne’ebe alerta katak tau atensaun maka’as ba atendimentu publiku. Ita hein katak mensagem sira ne’ebe kontinua hato’o husi entidades relavante sira ne’e bele kontribui diak liu tan disiplika iha PNTL ninian iha oin mai,” hateten Aderito Hugo.
Vise Prezidente PN ne’e dehan, numeru PNTL seidauk sufisiente, tanba agora dadauk foin iha numeru total hamutuk 3800 resin.
“Tenke halo tan rekrutamentu hodi nune’e responde ba nesesidades populasaun ninian aumenta tinan ba tinan, ita nia estatistik populasaun ne’e aumenta lais teb-tebes, ida ne’e ejiji numeru atendimentu publiku li-liu atu mantein lei no ordem, ita iha suku 442, ita presija polisia komunitaria mos hanesan numeru suku ne’e, distribuisaun to’o ona, mais fasilidades mak minimu teb-tebes,” dehan Aderito.
Husi sorin seluk, Deputadu David Dias “Mandati” hateten, oituan ou barak PNTL halo ona, sira mosu nudar institusaun nebe iha ona formatu ida, ne’e klaru ona, mais agora PNTL nia servisu ne’e masimu ou minimu.
“Hau dehan nafatin sedauk kompleta tamba sira nia filosofia sira sedauk lori, imi hatene apezar hau iha liur kleur, mais dehan iha bairo- bairo baku malu, tuda malu, oho malu, ne’e hau rona deit, karik iha, hau dehan nafatin ne’e sala Polisia nian,” hateten Mandati.
Nia hatutan tan katak failansu nebe durante akontese iha institusaun PNTL tamba falha profesionalismu husi komandante sira atu fo orientasaun ba membru sira, dala ruma membru sira prontu ona maibe komandante sira mak laiha preparasaun.
Nia esplika tan katak saida mak PNTL tenki halo maka kaer metin filosofi tolu ne’e ou troka hotu tamba hatudu ona katak Komandante sira la iha kbi’it.
“Hau koalia bebeik ba sira tamba saida mak sira la halo, troka komandante sira, se sira lakoi troka sira mak sei lori povu ne’e ba rai kuak tamba se laiha seguransa dezemvolvimentu mos sei la lao, se laiha dezemvolvimentu maka se laiha dame” dehan nia
Iha fatin hanesan Deputadu Francisco Branco fo parabens ba PNTL nebe halo tinan 16, tinan nebe nurak tebes.
“Polisia ita nian, Polisia povu nian, Polisia ita nia oan nian, Polisia estadu Timor nian, ita hein katak filisofia ida hanesan ne’e Polisia nebe orientadu ba komunidade tuir ita nia estatutu organika Polisia nian, ne’e duni Polisia nebe hamutuk ho povu, moris ho povu hodi defende povu labele sa fali kontraru,” hateten Francisco Branco.
Deputadu Cesar Valente hatete atu halo avaliasaun ba servisu PNTL durante tinan 16 ne’e kompetensia bo’ot iha sosiadade sira nia liman.
“Hau hanoin atu halo avaliasaun diak liu mak ita nia sosiadade, sira sente ka lae durante tinan 16 nia laran liu liu iha tinan 7 ou 8 mai ne’e sosiadade sira sente seguru ka lae ho servisu PNTL nian,” tenik Cesar Valente.
Nia hatutan iha buat rua maka importante permeiru dezemvolvimentu Estadu nian hanesan PNTL, segundu hare kona ba atendementu publik PNTL relassiona ho seguransa povu nian.
“Ba hau iha progresu, tamba ita labele hare deit baku malu ema ida rua, ho komflitu iha fatin balun jeneraliza dehan katak ssituasaun iha Timor, ita nia Polisia sira halo servisu la diak, ne’e lae, tenki hare ho onestu, tenki apresia saida mak sira halo diak, ita kritika ba saida mak sira halo sedauk masimu,” nia hateten.
Nia hatutan klaru katak ema barak maka seidauk kontente ho servisu PNTL maibe difisil Polisia atu fo seguransa ba ema hotu hotu, difisil Polisia atu fo sseguransa ba uma kain ida ida ne’e difisil.
“Hau hakarak hatete sidadaun sira labele hanoin katak Polisia mak atu fo seguransa ita duni maka tenki fo seguransa husi ki’ik, bo’ot hotu hotu tenki kontribui ba seguransa mak ita foin sente katak ita nia rai seguru,” nia tenik. mia/Nes
Jornal Nacional