DILI - Partidu CNRT ho PD divorsiu nee problema sira nia uma laran, tamba uluk sira hamutuk halo koligasaun hodi kaer ukun, agora hamosu problema sira rasik maka buka rezolve, para tau aas interese nasional.
Lia hirak nee hatoo husi Sekertariu Taksforce Veteranus Jorge Alves Alias Wemoris, ba jornalista sira hafoin remata sosializasaun ba Lider komunitariu sira, konaba de limitasaun fronteira maritima, iha Salaun Administrasaun Munisipiu, Dili, Mataduru, Dili, Kinta (17/03/2016).
Probelma CNRT ho PD nee sira nia uma laran, tamba uluk sira maka halo koligasaun, neduni ami veteranus la iha komentariu ba assuntu ida nee, ami neutra ba partidu hotu-hotu, maibe ami husu ba partidu hotu, tau unidade nasional sai hanesan assuntu neebe importante hodi defende ita nia integridade nasional,” hateten Wemoris.
Veteranus Wemoris nee salenta liu tan katak sira veteranus la inklina aan iha kualker partidu, seiza CNRT ou PD, ba sira veteranus dehan partidu sira nee diak hotu, tamba partidu iha para halo dezenvovimentu, tamba partidu maka jere povu nia halerik, povu susar no povu nia terus.
Iha fatin hanesan Prezidente Interinu Komisaun Homenazen Alin Laek hateten konaba problema partidu CNRT ho PD nee sai sasukat ida ba partidu hotu, hodi estuda didak wanhira atu ba ukun.
Nunee mos Veteranus Helio da Costa hateten sira veteranus laos koalia konaba partidu politiku, maibe sira nudar veteranus sai inspirador hodi kontribui ba hadia dezenvovimentu povu no nasaun nia moris. Informasaun kompletu iha STL jornal no STL Web, edisaun Sabado (19/3/2016). Joao Anibal
Suara Timor Lorosae