Papa Francisco simu prezidente repúblika portugés, Marcelo Rebelo de Sousa, iha loron-kinta ne'e iha audiénsia ida ne'ebé dura minutu 30 resin, no xefe Estadu na'in rua ne'e troka ona prezente sira.
Besik tuku 10:06 (oras lokal), Marcelo Rebelo de Sousa no papa Francisco hasoru malu, no xefe hosi Igreja Katólika fó benvindu ba nia homólogu portugés, hafoin ne'e sira na'in rua tama iha gabinete papa nian no tuur hamutuk iha sekretária.
Enkontru ne'e hotu iha tuku 10:32 (oras Vatikanu nian), momentu ne'ebé jornalista sira bele tama no asisti kumprimentu sira hosi papa Francisco ba komitiva sira hosi xefe Estadu portugés nian.
Hodi hakotu, Prezidente repúblika portugés oferese ona ba papa konjuntu ida ho kazula neen, ne'ebé pinta hosi arkitetu portugés Álvaro Siza Vieira - sasán relijiozu ho kór oioin, adekuadu ba tempu litúrjiku oioin sira, iha kór matak, kór roxu, kór azul, kór mean, kór mutin no kór roza.
Marcelo Rebelo de Sousa oferese mós, ne'ebé mai hosi nia kolesaun partikulár, rejistu ida hosi Santo António.
Papa oferese ona prezente sira ne'ebé rezerva ba xefe sira Estadu nian, ne'ebé konsisti iha, kazu ne'e, iha lian portugeza hosi karta sirkulár hosi papa "Louvado sejas" no ezortasaun apostóliku "Alegria do Evangelho", dokumentu boot rua hosi pontifikadu Francisco nian.
Papa oferese mós ba Marcelo Rebelo de Sousa medallaun ida hosi nia pontifikadu, ne'ebé iha ramu hosi ai-hun oliveira rua ne'ebé sasin ba malu.
Ko'alia ho lian españól, xefe hosi Igreja Katólika nian esplika ona katak ai oliveira hanesan sinal dame nian no misaun hosi polítiku sira maka harii dame.
Hafoin audiénsia papal, Marcelo Rebelo de Sousa hasoru malu ho kardeal Sekretáriu Estadu hosi Vatikanu nian, ne'ebé ekivale ho funsaun hosi primeiru-ministru, Pietro Parolin.
Prezidente Repúblika portugés nian to'o iha Vatikanu iha tuku 10:00 (oras loka) no simu hosi guarda-suisu iha pátiu interiór, hafoin ne'e sa'e ba andar datoluk, iha perkursu ida ne'ebé liuhosi kakuluk oioin ho pintura hosi pintór renascentista Rafael.
SAPO TL ho Lusa