Xefi Suku Comoro, Eurico da Casta de Jesus, husu ba komunidade sira iha area Comoro nian atu labele halo uma besik iha Mota ninin, tanba mota ninin Comoro bele fo risku tebes ba dezastre.
“Governu bandu ona katak ema labele halo uma besik mota ninin comoro nian, se komunidade sira lakohi halo tuir sira nia hakarak halo uma nafatin ne’e sira mak hakarak. Foin dadauk loron hirak liu ba udan bo’ot mota tun iha uma kain 7 mak mota lori ba tasi,” deklara Eurico da Casta de Jesus ba Jornalisra sira iha Sede Suco Comoro Segunda (15/03/2016).
Nia parte rasik orienta ona Xefi Aldeia husi suco Comoro nian fo hatete bei- beik ona ba komunidade sira ne’ebe halo uma besik iha mota ninin tenke buka fatin muda sai ona, maibe komunidade sira laiha konsiensia.
“Ita nia komunidade mak laiha konsiensia nafatin ami nudar liman ain Governu nian fo hateten bei-beik, maibe ita nia komunidade nunka mais rona, sira halo nafatin uma iha mota ninin,”lamenta Eurico.
Entretantu Abitu Corea Lemos hanesan komunidade ne’ebe hela besik mota ninin comoro, dehan, nesesidade moris mak obriga sira halo uma besik mota ninin.
“Ami halo uma iha ne’e tanba atu buka moris. Tanba ne’e ha’u husu ba Governu fo fatin ne’e mai ami hodi hela hodi buka moris hodi sustenta ami nia familia uma laran,”dehan Abitu.car
Jornal Nacional