Konsultora EY ho Governu Timor-Leste asina tiha ona akordu ida hodi harii matadalan ida ba promosaun investimentu estranjeiru iha nasaun ne'ebé sei serve mós hanesan insentivu ba dezenvolvimentu ekonómiku sustentável.
"EY Portugal ho TradeInvest Timor-Leste asina tiha ona memorandu ida ne'ebé nia objetivu maka hala'o Matadalan Investimentu ida ba Timor-Leste", hakerek iha komunikadu ida ne'ebé fahe ba imprensa, ne'ebé subliña aposta hosi ajénsia "iha investimentu esternu hanesan insentivu ba kresimentu ekonómiku no dezenvolvimentu sustentável nasaun nian, iha tempu hanesan promove teritóriu hamutuk ho potensiál investidór estranjeiru sira".
Komunikadu espesifika katak "estrutura hosi matadalan bazeia iha pontu importante sira kona-bá nasaun - pozisionamentu jeográfiku, asesibilidade internasional, espasu ekonómiku ne'ebé nia halo parte - nune'e mós informasaun kona-bá enkuadramentu matéria legal, finanseiru no fiskal".
Aleinde ne'e, "informasaun kona-bá área no rejiaun sira oportunidade nian, nune'e mós ba reforma sira ne'ebé aprova tiha ona hosi Governu hanesan tema sira seluk ne'ebé maka sei ko'alia iha Matadalan Investimentu nian ba Timor-Leste", ne'ebé ekipa serbisu nian konstitui hosi konsultór sira EY Portugal nian no hosi tékniku sira hosi TradeInvest Timor-Leste nian.
Dokumentu ne'e sei aprezenta iha fórum ida aprezentasaun hosi Timor-Leste ba investidór estranjeiru sira ne'ebé sei hala'o iha tinan ne'e iha Díli.
SAPO TL ho Lusa