DILI - Prezidente Repúblika (PR), Taur Matan Ruak ho Primeiru Ministru, Rui Maria de Araújo, konkorda ona atu halo diálogu hodi hakotu kazu ezonerasaun Maijór Jenerál, Lere Anan Timur no nomeasaun Brigadeiru Jenerál Filomeno Paixão ba Maijór Jenerál hodi lidera F-FDTL.
“Prezidente disponivel para atu rona pontu de vista governu nian, governu mós disponivel atu rona argumentasaun señor Prezidente nian, seidauk to’o iha konkluzaun ida mas kuandu señor Prezidente fila hosi Japaun mai depois ami sei kontinua nafatin diálogu ida ne’e,” PM Rui informa ba jornalista sira hafoin enkontru ho Xefe Estadu iha Palásiu Prezidensial, Bairo-Pite, Dili, Kinta (10/03).
Enkontru durante oras rua hahú hosi tuku 3 to’o 5 lokraik, Xefe Estadu ho Xefe Governu aleide diskuti maka’as kona-ba kazu ezonerasaun, diskuti mos kona-ba ejekusaun orsamentu jerál estadu no programa vizita Prezidente nian ba Japaun, ne’ebé sei aranka hosi Dili, iha loron Sábadu (12/03/2016).
Kona-ba resposta Tribunal Rekursu (TR) nian ba karta governu nian relasiona ho rekursu kontesioza ne’ebé governu haruka ba TR, no TR haruka fila fali rekursu governu nian ne’e, antes ne’e, PM Rui afirma, sei estuda fali rajaun TR nian no posibilidade rekore fali rekursu ba TR.
Tribunál Rekursu deside haruka fila rekursu kontensiozu Governu nian iha loron Kinta (02/03). (dgx)
Timor Post