Iha priméiru konferénsia nasionál Antigu Kombatentes da Libertasaun Nasionál durante loron tolu (3), aprova ona rezolusaun de apelu ba problema entre Prezidente Repúblika Taur Matan Ruak, Eis-Guerilleiru Kay-Rala Xanana Gusmão ho Sekretáriu Jerál Partidu FRETILIN, Dr. Marí Alkatiri hodi rezolve problema liu-hosi dalan díalogu.
Prezidente Partidu FRETILIN, Francisco Guterres (Lu-Olo) ne’ebé maka sai hanesan prezidente meza ba konferénsia veteranus iha Sentru Konvensaun Díli (CCD) hateten, veteranu sira asina ona karta ida sai hanesan rezolusaun de apelu ba líder na’in tolu (3) ne’e hodi rezolve sira nia problema.
“Veteranu sira asina de’it karta ida. Tipu de karta ne’e rezolusaun maibé hanesan rezolusaun de apelu ou deklarasaun de apelu ba líder na’in rua (2) ka na’in tolu (3) ne’ebé dehan katak liafuan naksalak ba malu,” Lu-Olo dehan iha CCD, Eis Merkadu Lama, Díli (03/03/2016).
Nia informa, karta rezolusaun ne’e hetan aprova hosi konfresista sira ne’ebé iha asembleia ne’e, depois sei haruka sentimentu veteranu sira nian liu-hosi karta ne’e ba Prezidente Repúblika, Minístru Planeiamentu no Investimentu Estratéjiku, Kay-Rala Xanana Gusmão ho Sekretáriu Jerál Partidu FRETILIN, Marí Alkatiri.
Ekipa de asina karta apela diriji hosi Komandate Falur Rate Laek. Karta deklarasaun de apelu ne’e sei haruka ba Prezidente Repúblika, Eis Primeiru Ministru Kay-Rala Xanana Gusmão no mós Prezidente ZEESM, Marí Alkaieri, hodi husu sira túr hamutuk atu rezolve problema refere.
Deklarasaun apelu hatudu pozisaun veteranu sira iha konferénsia ninian, husu ba sira atu hamutuk halo díalogu ko’alia ba malu para ema seluk labele aproveita oportunidade ida ne’e para sobu ita nia unidade.
Entretantu, Komandante Falintil-Forsa Defeza de Timor-Leste (F-FDTL), Falur Rate Laek haktuir, sira na’in tolu ábitu ida uluk kedas kontra malu. Diferénsia ideias ne’e normál.
Falur dehan, atu lori nasaun ne’e ba oin tenki iha diferénsia ideia, maibé ohin loron ema polítiku barak, sosiedade sivil sira, inklui mídia sira halo publikasaun oi-oin hodi hamosu interpretasaun oi-oin iha públiku tuir ema nia kompriensaun.
“Entaun ami nia pozisaun ne’e saída? Ami nia pozisaun ne’e apelu para rekonsilliasaun,” Falur hateten. Nia esplika, rezolusaun ne’e la’os órden maibé líder na’in tolu ne’e iha hanoin di’ak entaun kumpri ba rezolusaun ne’e tanba sira maka harii nasaun ne’e.
Iha sorin seluk, Vise Minístru Solidariedade Sosial, Miguel Manetelu informa, karta deklarasaun de apelu ne’e sei haruka ba Prezidente Republika, Taur Matan Ruak, Komandante en-xefi, Kay-Rala Xanana Gusmão, no mós ba Dr. Marí Alkatiri.
“La persiza ona forma ekipa. Ne’e hanesan deklarasaun de apelu ida ba sira na’in tolu (3),” Mandtelu hato’o.
Deklarasaun de apelu sei haruka ba sira na’in tolu (3) katak ne’e pozisaun veteranu sira nian iha konferénsia. (Arif)
Matadalan